Yfirlýsing: Frásögn Berserkja nokkuð einhliða

Meistaraflokkur Grundarfjarðar hefur gefið frá sér yfirlýsingu í ljósi ásakana Berserkja um atvik eftir leik liðanna í gærkvöldi.

Að sögn stjórnar meistaraflokks Grundarfjarðar er um einhliða lýsingu á atvikinu að ræða sem komi niður á sannleiksgildi sögunnar. Benda þeir einnig á að Berserkir gætu  ekki kvartað undan aðstæðum enda hafi Grundarfjörður lagt til að færa leikinn á sunnudaginn þegar aðstæður voru betri.

Yfirlýsinguna má lesa hér fyrir neðan.

„Yfirlýsing Meistaraflokks Grundarfjarðar

Stjórn meistaraflokks Grundarfjarðar í knattspyrnu harmar mjög það atvik er varð eftir leik Grundarfjarðar og Berserkja mánudagskvöldið 26. maí síðastliðið. Einnig finnst okkur yfirlýsing gestaliðsins er birtist á fésbókarsíðu þeirra nokkuð einhliða þar sem að Kristinn Aron Hjartarson er sakaður um ósæmilega hegðun. Yfirleitt er einhver forsaga að svona en það þóknast þeim ekki að minnast á að 5-6 leikmanna þeirra hópast að fyrirliða Grundarfjarðarliðsins og svo að öðrum leikmönnum fyrir utan klefa okkar. Þar var Kristinn kallaður öllum illum og ósæmilegum nöfnum í vitna viðurvist en þar var einmitt ungur sonur Kristins staddur. Þurftu starfsmenn leiksins að skakka leikinn og er þetta hvorugu liði til framdráttar.

Einnig setja stjórnarmenn Berserkja út á aðstæður til knattspyrnuiðkunar en þær voru vægast sagt ekki góðar, en það á samt við um bæði lið en ekki bara gestaliðið eins og þeir gefa í skyn á fésbókarsíðu sinni.

Tilvitnun: "Þessar aðstæður hentuðu knattspyrnuliðinu sem mætti til leiks illa." Tilvitnun lýkur.

Það er ekki eins og leikmenn Grundarfjarðar séu vanir að spila við slíkar aðstæður og því hentaði þetta báðum liðum jafn illa. Það má líka geta þess að leikmönnum Berserkja bauðst að mæta á sunnudeginum 25. Maí þar sem að veðurspá var góð og var hið besta knattspyrnuveður, logn og smá rigning. En þeim þóknaðist ekki að mæta á sunnudeginum og vildu heldur mæta á mánudeginum þar sem að veðurspáin var svipuð og á laugardeginum þegar að leiknum var frestað.

Við í stjórn meistaraflokks Grundarfjarðar vonum að menn læri af þessu og láti skapið ekki hlaupa með sig í gönur eins og þarna gerðist. Einnig vonumst við til að veðrið verði skárra í þeim leikjum sem eftir eru í sumar.

Með virðingu og vinsemd.

Meistaraflokksráð Grundarfjarðar“