Áhorfendur standa á brettum í Úlfarsárdal

Tveir leikir fara fram á gervigrasvelli Framara í Úlfarsárdal í kvöld og verður því nóg um að vera í Grafarholtinu.

Fyrri leikurinn er viðureign Fram og KA í Borgunarbikarkeppni karla og hefst leikurinn klukkan 17.30. Áætlað er að viðureign Fram og KR í Borgunarbikarkeppni kvenna hefjist klukkan 20.30 en það gæti dregist verði fyrir leikurinn framlengdur.

„Þetta verður heimilislegt og kósí hjá okkur,“ sagði Sverrir Einarsson, formaður knattspyrnudeildar Fram, í samtali við Vísi í morgun en í gær var unnið að því að koma upp bráðabirgðaaðstöðu fyrir áhorfendur.

„Við röðuðum brettum í kringum völlinn í gær og komum fyrir auglýsingaskiltum til að skilja að völlinn og svæði áhorfenda. Allir leikmenn 2. flokks verða svo í gæslu en það má geta þess að í hálfleik fá þeir afhend verðlaun fyrir sigur í Reykjavíkurmótinu,“ bætti Sverrir við.

„Við erum því nokkuð brattir fyrir leikinn. Það er fínt aðgengi að vellinum og nóg af bílastæðum,“ sagði Sverrir sem segir að völlurinn geti tekið við allt að 600 áhorfendum í kvöld. „Ég á reyndar ekki von á að það verði löng biðröð við miðasöluna en það er engu að síður mikil stemning fyrir leikjunum í Grafarholtinu.“

Framarar hafa spilað leiki sína á gervigrasinu í Laugardal í vor en sá völlur er upptekinn í kvöld. Kvennalið Fram hefur spilað alla leiki sína í Úlfarsárdal en nú þurfa bæði lið að deila vellinum. Það flækir málin að aðeins tveir búningsklefar eru við völlinn.

Leikmenn kvennaliða Fram og KR fá því búningsklefana ekki fyrr en eftir sinn leik og þurfa því að mæta tilbúnar á völlinn í kvöld. „Svona var þetta líka um daginn þegar tveir leikir fóru fram sama kvöldið í Laugardalnum. Þegar ástandið er svona þurfa allir að leggjast á eitt. Ég held að það verði skemmtileg stemning í kringum leikina,“ sagði Sverrir.

Eins og fram kemur í fréttinni hér fyrir neðan eru ekki jafn strangar kröfur um leiki í bikarkeppni og í Pepsi-deildinni sem gerir Fram kleift að láta leikinn gegn KA fara fram í Úlfarsárdal í kvöld.