Pírötum berst aðstoð að utan

Þrír fulltrúar Píratahreyfingunnar frá Þýskalandi eru staddir hér á landi um þessar mundir að aðstoða íslenska starfsbræður sína í komandi borgarstjórnarkosningum. Tveir þeirra, þeir Fabio Reinhardt og Torge Schmidt, eiga sæti í borgarráði í heimalandinu, Fabio í Berlín og Torge í Slésvík-Holstein. Þórlaug Ágústsdóttir, sem skipar þriðja sætið á framboðslista flokksins í Reykjavík, segir að þýsku píratarnir hafi margt að kenna þeim íslensku.

„Já og við þeim,“ segir Þórlaug. „Við erum náttúrulega svo framarlega í rafrænu lýðræði og slíku.“

Að sögn Þórlaugar hafa þýsku píratarnir mikinn áhuga á hreyfingunni hérlendis og ákváðu sjálfir að koma hingað og leggja lið sitt við þá íslensku. Þeir gista heima hjá flokksmönnum á meðan kosningum stendur og hjálpa til í kosningabaráttunni eins og þeir geta. 

„Þeir hafa meðal annars verið að bera út bæklinga og bréf á Bergþórugötu,“ segir Þórlaug. „Milli þess höfum við verið að ræða hugmyndafræði flokksins og hugmyndir um íbúalýðræði. Svo eru þeir í ESB, þannig að við höfum líka verið að ræða svoleiðis mál.“

Þýsku hjálparhellurnar munu snúa aftur til heimalandsins beint í kjölfar kosninga.