Raikkonen: Ekki fleiri tilviljanakenndir snúningar

Kimi Raikkonen hefur átt í ítrekuðum vandræðum með að halda Ferrari bíl sínum í skefjum í beygjum á tímabilinu. Ótt og títt virðist bíllinn snúast án nokkurrar teljandi ástæðu. Raikkonen telur að nú sé liðið búið að finna lausnina á vandanum.

Finninn hefur átt erfitt með að ná upp hraða á tímabilinu. Hann hefur einungis náði í 18 stig í fyrstu sjö keppnum tímabilsins gegn 69 stigum liðsfélaga síns Fernando Alonso. Raikkonen segir að það hafi verið erfitt að finna út hvað var að valda því að bíllinn snérist svo auðveldlega.

„Við höfum skoðað marga hluti en það er mjög erfitt að segja hvað er að valda þessu,“ sagði Raikkonen.

„Vonandi getum við hér (í Austurríki) verið samkeppnishæfari og ánægðari með hvernig hlutirnir ganga og náð betri niðurstöðu,“ sagði finnski ökumaðurinn.

Raikkonen snérist tvisvar í sömu beygjunni í Kanada, einu sinni á æfingu og einu sinni í keppninni sjálfri.

„Þegar margir hlutir koma saman getur þetta gerst, við vissum eftir æfinguna en pældum líklega ekki nógu mikið í þessu, þetta mun ekki gerast aftur. Við höfum gert ýmsar breytingar síðan í síðustu keppni,“ sagði Raikkonen, sem hefur mikla reynslu af slíkri hegðun bíla eftir að hafa keppt í rallý í 2 ár.

„(Brautin í Austurríki) er ekki svo ólík kanadísku brautinni, sem hefur langa beina kafla og S-beygjur, og þessi hefur langa beina kafla og þrjár hraðar beygjur. En þessi ætti að vera betri en Kanada - Bahrain og Kanada voru erfiðustu brautirnar fyrir okkur og vonandi komum við núna og náum góðum árangri. En við sjáum hvernig þetta fer á morgun,“ sagði Kimi Raikkonen að lokum.

Fyrsta æfingin fyrir austurríska kappasturinn fer fram á morgun. Bein útsending verður á Stöð 2 Sport frá laugardagsæfingunni og hefst útsending klukkan 8:55.

Tímatakan er í beinni útsendingu klukkan 11:50 á laugardag og keppnin sjálf klukkan 11:30 á sunnudag, á Stöð 2 Sport.