Schöne tryggði Ajax stig gegn PSG

Hollandsmeistarar Ajax og Frakklandsmeistarar PSG skildu jafnir, 1-1, á Amsterdam Arena í fyrstu umferð riðlakeppni Meistaradeildar Evrópu í knattspyrnu í kvöld.

Kolbeinn Sigþórsson var í byrjunarliði Ajax í kvöld en tókst ekki að skora. Hann hefur nú spilað átta leiki í Meistaradeildinni án þess að koma boltanum í netið. Hann spilaði fyrsta klukkutímann fyrir Ajax í kvöld.

PSG tók forystuna á 14. mínútu þegar EdisonCavani skoraði fyrir gestina, en danski miðjumaðurinn LasseSchöne tryggði heimamönnum eitt stig með marki úr aukaspyrnu. Hann var svo hársbreidd frá því að skora úr annarri aukaspyrnu skömmu síðar.

Fín úrslit hjá Ajax sem er í erfiðum riðli, en í hinum leik riðilsins vann Barcelona sigur á AOPEL frá Kýpur.