Viðar og Ronaldo í baráttunni um gullskó Evrópu

Viðar Örn Kjartansson og Cristiano Ronaldo eru báðir meðal þriggja hæstu á listanum yfir markahæstu leikmenn Evrópu á tímabilinu 2014-15 en sigurvegarinn hlýtur að launum Gullskó Evrópu.

Viðar Örn hefur raðað inn mörkum með Vålerenga í norsku úrvalsdeildinni í fótbolta í ár en íslenski framherjinn hefur meðal annars tólf marka forskot á næstu menn í baráttunni um markakóngstitilinn í Noregi.

Viðar Örn er líka mjög ofarlega í baráttunni um gullskó Evrópu og nýtur þar góðs af því að vetrardeildirnar í Evrópu eru bara nýbyrjaðar.

Viðar er nú í þriðja sæti listans með 25 stig en leikmenn í norsku deildinni fá bara eitt stig fyrir hvert mark. Viðar hefur skorað 25 mörk í 27 leikjum með Vålerenga á 2014-tímabilinu.

Cristiano Ronaldo er þegar kominn með 16 mörk í 8 leikjum í spænsku deildinni en leikmenn á Spáni fá tvö stig fyrir hvert mark eins og leikmenn í bestu deildum Evrópu.

Cristiano Ronaldo og Luis Suárez fengu báðir gullskóinn á síðasta tímabili (31 mark - 62 stig) en Ronaldo vann Gullskó Evrópu einnig árin 2008 og 2011.

Efsti maður listans í dag er hinsvegar Rússinn Evgeny Kabaev sem skoraði 35 mörk í eistnesku deildinni á tímabilinu. Kabaev hefur þó bara þriggja stiga forskot á hinn magnaða Ronaldo.

Viðar er ekki fyrsti íslenski leikmaðurinn sem er ofarlega á þessum lista en Alfreð Finnbogason endaði í sjöunda sæti á listanum í fyrra.

Staðan

1. Evgeny Kabaev 35 stig

2. Cristiano Ronaldo 32 stig

3. Viðar Örn Kjartansson 25 stig