Byrjaðir á framhaldi Destiny

Fjölspilunarleikurinn Destiny, sem framleiddur er af höfundum Halo, er með 9,5 milljónir virka notendur samkvæmt útgefanda leiksins, Activision. Fyrirtækið gaf þessar tölur upp til fjárfesta eftir árangur þess var betri á þriðja ársfjórðungi en spár sögðu til um.

Á einungis fimm dögum seldist leikurinn fyrir 325 milljónir dala, eða tæpa 40 milljarða króna.

Í samtali sínu við fjárfesta sagði Eric Hirshberg frá Activision að aukapakki fyrir leikinn, The Dark Below, væri kominn vel á veg. Þá sagði hann að vinna væri hafin að framhaldsleik. Activision segir Destiny eiga stóran hluta í 78 prósent tekjuaukningu fyrirtækisins.

Framleiðendur Destiny, Bungie, segjast vilja byggja upp gríðarstóran söguheim í kringum leiki sína og hafa tíu ára áætlun fyrir heila leikjaseríu. Samkvæmt Gamespot vildu Activision ekki tjá sig frekar.