Upptökudagur hjá McLaren-Honda

McLaren liðið mun mæta á Silverstone brautina á morgun til að prufukeyra nýja Hondu vél fyrir bíl næsta árs. Slíkt er heimilt undir því yfirskyni að um upptökur á auglýsingum sé að ræða. Aka má 100 kílómetra.

McLaren og Mercedes munu hætta samstarfi sem varað hefur í 20 ár þegar keppnin í Abú Dabí er búin. Honda mun á næsta ári skaffa liðinu vélar og verða mun stærri hluti af liðsheildinni en Mercedes var.

Liðið hefur verið að smíða þróunarbíl til að prófa ýmislegt, bíll sem er sérstaklega hannaður til prófanna en ekki keppni. Áhugaverð hugmynd, hugsanlega munu fleiri lið fylgja í kjölfarið með svipaða útfærslu, til að komast hjá prófunarbanni. Almennt gildir bannið utan skipulagðra æfinga þar sem öllum býðst að taka þátt eða með því að smíða bíl sem er nógu ólíkur keppnisbílnum til að prófa ýmsa hluti á sem er það sem McLaren hefur nú gert.

McLaren á enn eftir að tilkynna hver mun aka bílnum á Silverstone á morgun. Einnig á liðið eftir að tilkynna hvaða ökumenn muni aka fyrir það á næsta ári. Fernando Alonso er að öllum líkindum að koma til liðsins frá Ferrari á met samningi samkvæmt orðrómum. Hver verður liðsfélagi hans er enn óljóst. Það virðist nokkuð ljóst að það verður annar núverandi ökumanna liðsins en hvort það verður reynsluboltinn Jenson Button eða efnilegi nýliðinn Kevin Magnussen, það veit enginn nema Ron Dennis sennilega.