Hamfarir á íþróttavöllum Kópavogs

Ómar Stefánsson, forstöðumaður íþróttavalla í Kópavogi, segist aldrei hafa séð grasvelli bæjarins koma jafn illa undan vetrinum og nú á þeim fjórtán árum sem hann hefur gegnt starfinu.

„Þetta eru ákveðnar hamfarir sem hafa átt sér stað,“ sagði Ómar en eins og ítrekað hefur verið fjallað um lágu grasvellir á höfuðborgarsvæðin undir klaka lengi í vetur sem olli miklum kalskemmdum.

„Sáning byrjaði fyrir tveimur vikum og kláraðist fyrir þremur dögum. Svo skoðum við hvort við sáum aftur í sumar en við þurfum klárlega að gera það aftur í haust,“ segir Ómar.

„Við munum nú taka stöðuna vikulega og upplýsa félögin um gang mála jafn óðum.“