Erfiðara að horfa á

Norðurlandamótið í fjölþrautum ungmenna fer fram á Kópavogsvelli um helgina en alls eru 56 keppendur skráðir til leiks, þar af þrettán frá Íslandi en undanfarin misseri hafa mjög margt efnilegt fjölþrautarfólk komið fram hér á landi.

Í þeirra hópi eru synir Jóns Arnars Magnússonar, fyrrum tugþrautarkappa. Krister Blær keppir í flokki 18-19 ára en Tristan Freyr í flokki 16-17 ára.

„Þeir eru orðnir mun betri en ég var á þeirra aldri,“ sagði Jón Arnar í samtali við Fréttablaðið í gær. „Þeir vita þó að það er engin pressa á þeim enda gera þeir þetta allt á sínum forsendum.“

Fyrr í vetur bætti Tristan Freyr Íslandsmetið innanhúss í sjöþraut í sínum aldursflokki er hann fékk 4741 stig en hann á einnig metið í stangarstökki innanhúss í sama aldursflokki. Báðir hafa stórbætt árangur sinn á milli ára og báðir eru öflugir í stangarstökki, rétt eins og karl faðir þeirra var.

Margfalt erfiðara að horfa á

Jón Arnar kunni þá list vel að halda ró sinni í keppni og hefur komið því áleiðis til sona sinna. „Þeir eru vanir að umgangast íþróttina og keppa á mótum. Þeir vita hvernig þeir eiga að haga sér og takast á við íþróttina af stóískri ró,“ segir Jón Arnar en viðurkennir að það sé mun erfiðara að standa á hliðarlínunni en keppa sjálfur.

„Það er margfalt erfiðara. Nú veit ég hvernig konunni minni leið þegar ég keppti,“ sagði hann í léttum dúr. „Upplifunin er allt öðruvísi því maður getur ekkert gert nema að sýna strákunum stuðning.“

Jón Arnar tekur undir að aðstæður til æfinga í frjálsíþróttum hafi mikið breyst á undanförnum árum, sérstaklega í samanburði við þær aðstæður sem hann æfði við á Sauðárkróki sem ungur maður.

„Það var frábært að fá aðra höll við Laugardalshöllina og frábært fyrir komandi kynslóðir. Það hefur verið mikil uppbygging í íþróttinni og mikið af efnilegu frjálsíþróttafólki að koma upp. Maður vildi helst að maður væri sjálfur 30 árum yngri,“ segir hann og hlær.

Sveinbjörg á titil að verja

Sveinbjörg Zophaníasdóttir er ein þeirra en hún á titil að verja í flokki 22ja ára og yngri. Hún á næstbestan árangur í sínum aldursflokki í ár, 5479 stig, á Norðurlöndunum en aðeins Frida Thorsås frá Noregi hefur gert betur með 5533 stig. Ingi Rúnar Kristinsson og Arna Stefanía Guðmundsdóttir þykja einnig líkleg til afreka en bæði hafa áður unnið til verðlauna á Norðurlandamótum.

Fyrri keppnisdagur hefst á Kópavogsvelli klukkan 9.15 í dag og sá síðari á morgun klukkan 10.00.