Fyrirliðinn ekki lengur flippaði gaurinn í landsliðinu

Akureyringurinn og landsliðsfyrirliðinn Aron Einar Gunnarsson á að baki sex ára feril með íslenska landsliðinu. Hann er leikjahæsti leikmaður þess í dag með 48 leiki og er löngu búinn að festa sig í sessi sem akkerið á miðju Íslands. Hann er þó aðeins 25 ára gamall og á því enn sín bestu ár fram undan í knattspyrnunni.

Fréttablaðið settist niður með honum á hóteli landsliðsins í Brussel daginn eftir tap þess í vináttulandsleiknum gegn Belgíu. Aron Einar var annar tveggja fastamanna landsliðsins sem var í byrjunarliðinu á miðvikudag og eins og mönnum var tíðrætt um var leikurinn kærkomin reynsla fyrir þá sem hafa staðið fyrir utan liðið í frábærri undankeppni EM 2016 til þessa.

„Við sýndum í þessum leik að allir í okkar hópi eru tilbúnir að leggja sig fram og vilja vera hluti af þessu góða landsliði okkar,“ segir Aron Einar og það er greinilegt að hann er stoltur af hópnum. „Það jákvæðasta við það allt saman er hversu samheldinn hópurinn er og viljinn til að vinna hver fyrir annan er alltaf til staðar. Það er unaðslegt að fá að vera fyrirliði þessa hóps.“

Meiri tækni í landsliðinu nú

Af þeim 24 leikmönnum sem eru í landsliðshópnum nú eru fimmtán fæddir á árunum 1986 til 1990. Þar af eru átta úr frægu U-21 liði Íslands sem fór í lokakeppni EM sumarið 2011. Aron segir að landsliðið í dag njóti þess hversu vel leikmennirnir þekkjast.

„Það er stærsti munurinn á landsliðinu nú og þegar ég kom fyrst inn í það. Við kunnum hver á annan, út og inn. Það er alltaf stutt í húmorinn hjá okkur en þannig hefur það líka alltaf verið í landsliðinu,“ segir Aron Einar.

„Árið 2008 voru ef til vill stærri karakterar í landsliðinu og fleiri leikmenn sem höfðu meiri líkamlegan styrk. En ég fer ekki leynt með það að það er komin meiri tækni í hópinn núna og eins og áður hefur verið bent á er það fótboltahöllunum að miklu leyti að þakka.“

Næstum búinn að tala sig út

Aron hefur gengið í gegnum ýmislegt sem fyrirliði íslenska landsliðsins en hann var næstum búinn að tala sig úr stöðunni þegar hann lét fræg ummæli falla í aðdraganda landsleiks gegn Albaníu.

„Ég hef lært heilmikið í þessu ferli og lært á sjálfan mig. Ég finn fyrir gífurlegum stuðningi leikmanna og virðingu þeirra líka. Þeir koma ekkert öðruvísi fram við mig en aðra bara af því að ég er fyrirliði en ég finn að þeir hlusta á mig. Ég fyllist stolti í hvert sinn sem ég leiði þennan hóp út á knattspyrnuvöll.“

Og hann segir að reynslan í Albaníu hafi kennt sér margt. „Ég lærði hvernig maður á að takast á við hlutina þegar illa gengur. Ég hef náð að kúpla mig niður og hugsa um það sem ég segi – ekki vera þessi flippaði gaur sem ég var. Þannig var ég – ég hafði gaman af því að fara í viðtöl og fólk hafði gaman af því að hlusta á mig.“

Hann segir að landsliðsþjálfarinn Lars Lagerbäck hafi veitt honum fullan stuðning í því ferli. „Hann stóð alltaf við bakið á mér þó svo að einhverjir hefðu viljað taka af mér fyrirliðabandið í þessum leik. En ég ætlaði ekki að gefa það eftir svo auðveldlega, loksins þegar ég var kominn með það.“

Lars ætlar með Ísland á stórmót

Hann vonast til að eiga langan feril fyrir höndum með landsliðinu og að enn betri dagar séu fram undan. „Þegar Óli [Ólafur Jóhannesson, fyrrverandi landsliðsþjálfari] byrjaði að taka inn alla þessu ungu stráka sá maður að það var eitthvað gott í gangi. Við erum nú að uppskera eftir þau kynslóðaskipti,“ segir Aron Einar.

„Við verðum þó auðvitað að halda okkur á jörðinni enda ekkert unnið enn. Ég veit þó að strákarnir eru hungraðir og vilja spila á stórmóti. Það er markmið okkar allra og þjálfaranna líka. Ég veit til dæmis að Lars vill og ætlar sér að fara með okkur á stórmót.“

Voru ekki að hvíla menn

Hann bendir á að leikurinn gegn Belgíu hafi verið hluti af þeirri áætlun.

„Þjálfararnir voru ekki að gera allar þessar breytingar til að hvíla menn heldur vildi hann gefa öðrum tækifæri til að spila. Heimir og Lars ætluðu sér að vinna leikinn rétt eins og alla aðra. Hugsunarhátturinn í landsliðinu er breyttur frá því sem áður var og það er afar jákvætt.“