Arna Stefanía: Það er erfitt að vera hvít kona í spretthlaupum

Ein efnilegasta sjöþrautarkona landsins hefur ákveðið að gera stórtækar breytingar á ferli sínum. Aðeins þrjár konur eiga betri árangur en Arna Stefanía Guðmundsdóttir í sjöþraut á Íslandi en þessi nítján ára Breiðhyltingur hefur nú ákveðið að einbeita sér að spretthlaupi, bæði 200 og 400 m, sem og grindahlaupi. Þar að auki ákvað hún að ganga til liðs við FH frá uppeldisfélaginu ÍR.

„Mér fannst þetta góður tímapunktur til að breyta til,“ segir Arna Stefanía í samtali við Fréttablaðið. „Langstökkið hefur verið í ólagi í fjögur ár og ég hef verið slæm í hásininni sem hefur gert mér erfitt fyrir í hástökkinu. Kúluvarpið hefur svo verið hræðilegt en mér hefur alltaf gengið vel í hlaupunum,“ segir Arna Stefanía sem er að stíga upp úr meiðslum sem hún varð fyrir á Norðurlandamótinu í sumar. Hún var í forystu í sjöþrautinni þegar hún meiddist á ökkla.

„Samstarfið við Þráin [Hafsteinsson, þjálfara] hefur alltaf gengið vel en þegar ég meiddist í sumar fundum við bæði að það væri betra fyrir mig að breyta til. Ég æfði aðeins með Silju [Úlfarsdóttur] í sumar og leist vel á þjálfarana og aðstöðuna hjá FH. Ég ræddi einnig við Akureyringa en valdi að lokum FH.“

Þráinn sagði í viðtali við Fréttablaðið í upphafi mánaðarins að takmarkaður aðgangur að hinni glæsilegu frjálsíþróttahöll í Laugardal væri afar bagalegur fyrir íþróttafélögin í Reykjavík og ekki síst afreksfólk borgarinnar í frjálsíþróttum.

„Það var ekki helsta ástæðan fyrir ákvörðun minni þó það hafi vissulega spilað stórt hlutverk,“ segir Arna Stefanía en FH hefur mun betra aðgengi að sinni aðstöðu, eins og Þráinn benti á í áðurnefndu viðtali.

Læt reyna á þetta í tvö ár

Arna Stefanía klárar stúdentspróf í vor og stendur því á ákveðnum tímamótum, bæði í skólagöngu og á íþróttaferli.

„Ég hef verið að velta því lengi fyrir mér hvernig ég eigi að skipuleggja næstu ár hjá mér. Ég mun láta reyna á þetta næstu tvö árin hið minnsta en ef það gengur ekki hjá mér getur vel verið að ég fari að einbeita mér að einhverju öðru,“ segir Arna Stefanía en áður hefur verið bent á að margt efnilegt íþróttafólk ákveði á þessum tímapunkti að helga sig frekar náms- eða starfsferli sínum en að freista þess að gerast afreksmaður í sinni íþrótt.

„Það kemur til greina að byrja strax í háskólanámi en ég væri líka til í smá frí til að geta einbeitt mér að íþróttinni. En þá þyrfti ég að vinna með,“ segir hún og bætir við að hún þyrfti myndarlega styrki til að geta helgað sig frjálsíþróttunum. Hingað til hefur hún meðal annars þurft að stóla á stuðning fjölskyldu sinnar.

„Ég á góða fjölskyldu sem hefur stutt mig. Ég hef til dæmis ekki getað fjármagnað æfingaferðirnar mínar sjálf,“ segir hún en Arna Stefanía hefur undanfarin ár verið að fara í 2-3 æfingaferðir út fyrir landsteinana. „En ég held að ég fari bara í eina núna.“

Mun skemmtilegra að hlaupa

Arna Stefanía missti af HM nítján ára og yngri í sumar vegna áðurnefndra meiðsla en stefnir að því að keppa á EM 22 ára og yngri næsta sumar.

„Ég tel að það sé raunhæft markmið fyrir mig,“ segir hún þrátt fyrir að alþjóðleg samkeppni sé gríðarlega mikil í spretthlaupum. „Það segir sig sjálft að það er erfitt að vera hvít kona í spretthlaupum en það er hægt. En tilfellið er einfaldlega að mér finnst mun skemmtilegra að hlaupa,“ segir hún.

Arna Stefanía viðurkennir þó að það sé skrýtin tilhugsun að skipta um félag enda hefur hún æft í ÍR frá átta ára aldri. „Ég þekki þó marga í þessum heimi og veit að ég er ekki að fara að missa neina vini. Ég vona bara að ef fólk er ósátt tali það við mig í stað þess að baktala mig. Auðvitað eru einhverjir ÍR-ingar ósáttir en þá eru þeir ekki að hugsa um hvað þjóni mínum hagsmunum best. Oft er það þannig í þessari íþrótt að maður þarf að hugsa um sjálfan sig.“

Arna Stefanía klárar stúdentspróf í vor og stendur því á ákveðnum tímamótum, bæði í skólagöngu og á íþróttaferli.

„Ég hef verið að velta því lengi fyrir mér hvernig ég eigi að skipuleggja næstu ár hjá mér. Ég mun láta reyna á þetta næstu tvö árin hið minnsta en ef það gengur ekki hjá mér getur vel verið að ég fari að einbeita mér að einhverju öðru,“ segir Arna Stefanía en áður hefur verið bent á að margt efnilegt íþróttafólk ákveði á þessum tímapunkti að helga sig frekar náms- eða starfsferli sínum en að freista þess að gerast afreksmaður í sinni íþrótt.

„Það kemur til greina að byrja strax í háskólanámi en ég væri líka til í smá frí til að geta einbeitt mér að íþróttinni. En þá þyrfti ég að vinna með,“ segir hún og bætir við að hún þyrfti myndarlega styrki til að geta helgað sig frjálsíþróttunum. Hingað til hefur hún meðal annars þurft að stóla á stuðning fjölskyldu sinnar.

„Ég á góða fjölskyldu sem hefur stutt mig. Ég hef til dæmis ekki getað fjármagnað æfingaferðirnar mínar sjálf,“ segir hún en Arna Stefanía hefur undanfarin ár verið að fara í 2-3 æfingaferðir út fyrir landsteinana. „En ég held að ég fari bara í eina núna.“

Uppfært 12.45: Arna Stefanía vildi koma eftirfarandi á framfæri, eins og lesa má nánar um hér.

Arna Stefanía vildi leggja áherslu á að með ummælum sínum um að það sé erfitt fyrir hvítar konur að ná árangri í spratthlaupum hafi hún einvörðungu verið að vísa til þess að gríðarleg alþjóðleg samkeppni ríkir í spretthlaupum og að þar hafi þeldökkir hlauparar haft mikla yfirburði síðustu áratugina.

„Ég meinti ekkert illt með þessum ummælum og var frekar að hrósa árangri þessa góða íþróttafólks sem hefur skarað fram úr í spretthlaupum á heimsvísu undanfarin ár,“ segir hún.