Englandsmeistararnir þurfa að klára erfitt verkefni án Aguero

Riðlakeppni Meistaradeildar Evrópu lýkur í kvöld. Stórlið Man. City á það á hættu að falla úr keppni í kvöld.

City þarf að leggja Roma að velli á Ítalíu og vonast til þess að Bayern afgreiði CSKA Moskvu snyrtilega á Allianz Arena. Bayern er búið að vinna riðilinn en City, Roma og CSKA eiga öll möguleika á því að fá farseðil í sextán liða úrslit.

Það verður því gríðarleg spenna í þessum leikjum. Það sem meira er þá á Man. City ekki einu sinni möguleika á sæti í Evrópudeildinni ef liðinu bregst bogalistin á Ítalíu.

Til þess að gera verkefnið enn erfiðara fyrir City þá verður liðið án síns besta manns, Sergio Aguero, en hann er meiddur.

„Þessi riðill er búinn að vera skrautlegur og það er allt undir hjá báðum liðum. Þess vegna ætti þetta að geta orðið frábær leikur,“ segir Pablo Zabaleta, leikmaður Man. City.

„Við erum með liðið til þess að klára þennan leik. Markmið okkar var alltaf að fara áfram og það hefur ekkert breyst. Sjálfstraust leikmanna er hátt um þessar mundir og því ekkert til fyrirstöðu að við mætum með höfuðið hátt í þennan leik og klárum verkefnið.“

Það er líka spenna fyrir stórleik Barcelona og PSG. Bæði lið eru komin áfram en berjast um efsta sæti riðilsins. Það er dýrmætt að ná toppsætinu eins og sýndi sig í sextán liða úrslitunum í fyrra er öll liðin sem unnu sína riðla fóru áfram í átta liða úrslit.