Bottas: Ég vil vera í besta bílnum

Valtteri Bottas, ökumaður Williams liðsins segist vilja vera í besta möglega Formúlu 1 bílnum. Honum er sama hjá hvaða liði það er.

Frank Williams, eigandi Williams liðsins lýsti Bottas sem „einfaldlega einn hæfileikaríkasti ungi ökumanður sem ég hef kynnst,“ sem er gríðarlegt hrós enda hefur Williams alið upp marga góða ökumenn. Má þar nefna Damon Hill og Jacques Villeneuve, fyrrum heimsmeistara Nico Rosberg kemur einnig úr röðum Williams.

Þrátt fyrir að aka núna fyrir Williams liðið kom fát á Bottas þegar hann var spurður hvort hann myndi taka sæti Kimi Raikkonen hjá Ferrari á næsta ári. Ferrari myndi þá skipta einum Finna út fyrir annan.

„Ég veit ekki hvernig samningur Kimi er, allt sem ég veit er að ég vil vera í besta bílum. Það er allt og sumt,“ sagði Bottas.

Raikkonen hefur nýlega sagt að hann hafi ekki áhyggjur af því hvort Ferrari vilji losna við hann á næsta ári.

„Ég veit ekki hvort það er áhugi til staðar,“ sagði Bottas um málið.

Bottas segir nýja bílinn svipaðan í akstri en kannski ögn betri en sá gamli. Hann vonast til að geta haldið áfram á svipaðri braut og í lok síðasta tímabils. Þá var Williams liðið það eina sem komst nálægt Mercedes liðinu.