Ronaldo skoraði og Real vann | Sjáðu mörkin

Cristiano Ronaldo og Marcelo skoruðu mörk Real Madrid er liðið vann 2-0 sigur á þýska liðinu Schalke og fór langt með að tryggja sér sæti í 8-liða úrslitum Meistaradeildar Evrópu.

Síðari leikur liðanna fer fram í spænsku höfuðborginnni þann 10. mars og ljóst að það verður erfitt verkefni fyrir þýska liðið.

Ronaldo hafði ekki skorað í þremur leikjum í röð fyrir Real Madrid og höfðu því margir áhyggjur af meintri markaþurrð kappans sem skorar venjulega í hverjum einasta leik - eða svo gott sem.

Sjálfsagt var því einhverjum létt þegar hann skallaði fyrirgjöf Dani Carvajal í markið á 27. mínútu og kom Madrídingum yfir. Aðeins nokkrum mínútum síðar urðu heimamenn fyrir áfalli er Klaas-Jan Huntelaar varð að fara af velli vegna meiðsla.

Schalke skapaði sér þó nokkur færi í síðari hálfleik en það langbesta fékk varamaðurinn Felix Platte, sem kom inn á fyrir Huntelaar, en laglegt skot hans hafnaði í slánni.

En gestirnir frá Spáni gerðu út um leikinn stuttu síðar er Brasilíumaðurinn Marcelo skoraði annað mark Real Madrid með stórglæsilegu skoti eftir sendingu Ronaldo.

Niðurstaðan því 2-0 sigur og má sjá mörkin úr leiknum hér fyrir neðan.

Cristiano Ronaldo kom Real Madrid með skallamarki í fyrri hálfleik: Real Madrid komst 2-0 yfir með stórglæsilegu skoti Marcelo á 79. mínútu: