Strax farið að vísa í fordæmisgildi Al-Thani dómsins

Það fordæmi sem dómur Hæstaréttar í Al-Thani málinu er talinn hafa kom glögglega í ljós í munnlegum málflutningi í Stím-málinu svokallaða í Héraðsdómi Reykjavíkur í gær.

Verjendur Lárusar Welding, fyrrum forstjóra Glitnis, og Jóhannesar Baldurssonar, fyrrum framkvæmdastjóra markaðsviðskipta bankans, tókust þar á við ákæruvaldið um aðgang að gögnum og dómkvaðningu matsmanna.

Reimar Pétursson, verjandi Jóhannesar, fór á fram á aðgang að ýmsum gögnum sem hann telur tengjast málinu og vitnaði í Al-Thani dóminn máli sínu til stuðnings.

Gerði hann þetta á grundvelli jafnræði aðila í málinu en hann óskaði eftir aðgangi að gögnunum, en ekki að fá afrit af þeim, eins og verjendur í Al-Thani málinu fóru fram á. Því var ítrekað hafnað og málinu ekki vísað frá á þeim grundvelli. Í dómi Hæstaréttar kemur þó fram að sakborningum hafi boðist að fá aðgang að gögnunum, en ekki afrit.

Farið fram á aðgang að gögnum og svo frávísun?

Á meðal þeirra gagna sem verjandi Jóhannesar vill fá aðgang að eru samskipti tveggja starfsmanna Glitnis varðandi Stím-viðskiptin. Er það vegna breytts framburðar annars þeirra í málinu, en fallið var frá saksókn á hendur manninum eftir að hann veitti rannsakendum upplýsingar um málið.

Saksóknari, Hólmsteinn Gauti Sigurðsson, mótmælti harðlega bæði kröfum um aðgang að gögnum sem og dómkvaðningu matsmanna. Sagði hann að ekki væri hægt að skilja Al-Thani dóminn sem svo að sakborningar ættu rétt á að fá gögn frá þriðja aðila, eins og í tilfelli starfsmanna Glitnis.

Auk þess gætu tölvupóstar þeirra gætu innihaldið upplýsingar um fjárhagsstöðu viðskiptavina sem falla undir bankaleynd og orðsendingar sem vörðuðu einkalíf þeirra.

Um þetta er fjallað í Al-Thani dómnum og vitnaði saksóknari í hann. Velti Hólmsteinn því svo upp hvort verið væri að fara fram á aðgang að gögnunum svo seinna væri hægt að fara fram á frávísun þess eins og gert var í Al-Thani málinu.

Stefndi fjármunum bankans í gríðarlega hættu

Stím-málið snýst um ákæru sérstaks saksóknara á hendur Lárusi Welding, Jóhannesi Baldurssyni, einum stjórnenda bankans, og Þorvaldi Lúðvík Sigurjónssyni, fyrrverandi forstjóra Saga Capital.  

Forsaga málsins er sú að félag að nafni Stím fékk tæplega 20 milljarða króna að láni frá Glitni til að kaupa hlutabréf í Glitni og FL Group í nóvember árið 2007. Seljandi bréfanna var Glitnir en um var að ræða rúmlega 4 prósenta hlut í hvoru tilfelli. Veðin fyrir láni Stíms voru í hlutabréfunum í Glitni og FL Group.

Glitnir var sjálfur seljandi bréfanna sem Stím keypti og lögðu hluthafarnir einnig fram tæplega 5 milljarða króna eiginfjárframlag vegna kaupanna á bréfunum. Þremenningarnir eru ákærðir fyrir þátt sinn í þessum lánveitingum, en grunur leikur á um hafi verið að ræða tilraun til að halda verði á bréfum í Glitni hærri en eðlilegar forsendur voru fyrir.

Í ákærunni segir að Lárus hafi sem forstjóri og formaður áhættunefndar Glitnis misnotað aðstöðu sína til lánveitinga og stefnt fjármunum bankans í verulega hættu með því að lána Stím milljarða til að kaupa í bankanum sjálfum og FL Group.