Öruggir sigrar hjá HK og KA

Það verða HK og KA sem mætast í úrslitaleik í karlaflokki í bikarkeppni Blaksambands Íslands á morgun.

HK hefur unnið bikarinn undanfarin tvö ár en vinni liðið hann í þriðja sinn á morgun fá HK-ingar hann til eignar. HK er einnig ríkjandi deildar- og Íslandsmeistari.

HK-ingar áttu ekki í miklum vandræðum með Stjörnumenn í fyrri undanúrslitaleiknum. HK vann leikinn 3-0 (25-20, 25-17, 25-17).

Þrjú núll urðu einnig úrslitin í seinni úrslitaviðureigninni, þar sem KA bar sigurorð af Þrótti frá Neskaupsstað. Hrinurnar fóru 25-21, 25-19 og 25-10.

KA-menn hafa fimm sinnum orðið bikarmeistarar, síðast árið 2012, og geta bætt sjötta titlinum í safnið á morgun. Úrslitaleikurinn, sem fer fram í Laugardalshöll, hefst klukkan 13:30.