Lewis Hamilton á ráspól í Ástralíu

Lewis Hamilton á Mercedes náði ráspól fyrir ástralska kappaksturinn, liðsfélagi hans Nico Rosberg varð annar og Felipe Massa á Williams varð þriðji.

Eftir fyrstu hringina í fyrstu lotunni voru flestir ökumenn búnir að prófa grasið í kringum malbikið. Brautin hafði kólnað talsvert frá þriðju æfingunni og tapað gripi í kjölfarið.

Manor tók ekki þátt í tímatökunni. Liðinu tókst ekki að koma bíl á brautina. Mörg lítil vandamál komu í veg fyrir að bílarnir færu út.

Sauber liðið náði samkomulagi við Giedo van der Garde um að halda rekstri málsins áfram eftir keppnina. Van der Garde hafði fengið Hæstarétt Viktoríu fylkis til að skipa Sauber að setja hann í bílinn en hann hefur vikið fyrir Marcus Ericsson og Felipe Nasr.

Stórveldið McLaren eignaði sér öftustu ráslínuna með Jenson Button á undan Kevin Magnussen. Þetta var ekki byrjunin sem Honda vildi í endurkomu sinni. Button sagði fyrir tímatökuna „Þetta er bíllinn sem mun taka slaginn við Mercedes.“

Önnur lotan var róleg, Mercedes voru fljótastir og Ferrari menn fylgdu þeim fastast á eftir. Vindur á brautinni gerði ökumönnum erfitt fyrir. Carlos Sainsz Jr. á Toro Rosso kom helst á óvart, hann kom bílnum í þriðju lotu.

Þriðja lotan skar úr um hvor Mercedes ökumaðurinn náði ráspól. Hamilton réð lögum og lofum. Það átti enginn möguleika að skáka breska ökumanninum.

Hér fyrir neðan er gagnvirka tölfræðikortið þar sem sjá má úrslit tímatökunnar, skref fyrir skref.

Sjá einnig: Kristján Einar hitar upp fyrir Formúlu 1

Bein útsending frá ástralska kappakstrinum hefst á Stöð 2 Sport klukkan 4:30 í fyrramálið. Svo nú er bara að stilla vekjaraklukkuna.