Calderon: Vona að Bale verði áfram í herbúðum Real Madrid

Ramon Calderon, fyrrverandi forseti Real Madrid, segir að Gareth Bale eigi að vera áfram í herbúðum liðsins.

Bale, sem er 25 ára, var gagnrýndur harkalega eftir 2-1 tap Madrídinga fyrir Juventus í fyrri leik liðanna í undanúrslitum Meistaradeildar Evrópu í fyrradag.

Bale var nær ósýnilegur í leiknum en til marks um það snerti enginn leikmaður Real Madrid boltann sjaldnar en velski kantmaðurinn.

Þrátt fyrir erfiðleika á þessari leiktíð telur Calderon að Bale eigi að halda kyrru fyrir í Madird, en Walesverjinn hefur þrálátlega verið orðaður við t.d. Manchester United að undanförnu.

„Ég vona að hann verði áfram leikmaður Real Madrid,“ sagði Calderon sem gegndi forsetastöðunni hjá félaginu á árunum 2006-09.

„Hann virðist vera ánægður hér en eins og ég hef sagt áður er verðmiðinn á honum vandamálið,“ bætti Calderon við en Bale var keyptur á metfé til Real Madrid frá Tottenham sumarið 2013.