Eygló Ósk aftur með Norðurlandamet og komst í úrslitin

Eygló Ósk Gústafsdóttir tryggði sér sæti í úrslitasundi í 200 metra baksundi á HM í sundi í 50 metra laug í Kazan í Rússlandi og setti um leið Íslands- og Norðurlandamet.

Eygló Ósk Gústafsdóttir synti á 2:09.04 mínútum og bætti Norðurlandametið öðru sinni í dag en hún synti á 2:09.16 í undanrásunum í morgun.

Þetta er frábær árangur hjá Eygló sem komst í undanúrslitin í 100 metra baksundi á þessu móti þar sem hún setti líka Íslandsmet. Íslandsmetin hennar á mótinu eru því þegar orðin þrjú talsins.

Eygló varð sjöunda inn í úrslitin en fimm af átta sundkonum í úrslitasundinu syntu í hennar riðli sem var sá seinni.

Eygló var á undan þýsku sundkonunni Jenny Mensing sem var áttunda og síðustu inn í úrslitin en hún synti á nákvæmlega sama tíma og Eygló í morgun.

Ungverska sundkonan Katinka Hosszu náði besta tímanum alveg eins og í undanrásunum í morgun en önnur var hin ástralska Emily Seebohm.

Eygló Ósk hefur þar með bætt Norðurlandametið í 200 metra baksundi fjórum sinnum á þessu ári en hún eignaðist það fyrst á opna danska meistaramótinu í mars.

Eygló Ósk Gústafsdóttir er önnur íslenska sundkonan í sögunni sem kemst í úrslit á HM í 50 metra laug en Hrafnhildur Lúthersdóttir varð í sjötta sæti í 100 metra bringusundi á þessu sama móti.

Eygló Ósk mun synda í úrslitasundinu á morgun en á sunnudaginn mun hún síðan synda með íslensku boðssundsveitinn sem er að reyna að tryggja sér sæti á Ólympíuleikunum í Ríó á næsta ári.