Dortmund byrjar af krafti

Borussia Dortmund byrjar af miklum krafti í þýsku úrvalsdeildinni í knattspyrnu, en þeir unnu 4-0 sigur á Borussia Mönchengladbach í dag.

Marco Reus kom Dortmund yfir á fimmtándu mínútu, en þetta var áttunda mark Reus í síðustu átta deildarleikjum fyrir Dortmund. Pierre-Emerick Aubameyang tvöfaldaði svo forystuna á 21. mínútu.

Á 33. mínútu kom Henrik Mkhitaryan Dortmund í 3-0 og þannig stóðu leikar í hálfleik. Mkhitaryan skoraði annað mark sitt og fjórða mark Dortmund á 50. mínútu og þannig urðu lokatölur.

Þetta var fyrsti deildarleikur Thomas Tuchel sem þjálfari Dortmund, en hann tók við liðinu í sumar af Jurgen Klopp. Hann byrjar á góðum sigri, en Mönchengladbach endaði í þriðja sæti deildarinnar á síðustu leiktíð.