Hamilton fyrstur í mark í Rússlandi

Lewis Hamilton kom fyrstur í mark á Mercedes bílnum í Rússlandi. Sebastian Vettel varð annar á Ferrari. Sergio Perez kom Force India bílnum í þriðja sæti í mark á ótrúlegan hátt.

Nico Rosberg var fremstur á ráslínu en vandamál með inngjöfina gerðu honum ómögulegt að halda áfram. Mercedes gæti þó orðið heimsmeistari bílasmiða ef dómarar keppninnar ákveða að refsa Kimi Raikkonen fyrir áreksturinn við Valtteri Bottas.

Marcus Ericsson á Sauber lenti í samstuði við Nico Hulkenberg á Force India, sem hafði snúist á brautinni á fyrsta hring. Raikkonen var sigurvegarinn í ræsingunni, kom sér úr fimmta sæti í það þriðja á fyrstu beygjunum.

Öryggisbíllinn var kallaður út vegna samstuðs Ericsson og Hulkenberg. Öryggisbíllinn var úti í tvo hringi. Bottas endurheimti þriðja sætið af Raikkonen í endurræsingunni.

Vandamál kom upp í bíl Rosberg snemma í keppninni. Inngjöfin festist stundum opin og stundum ekki. Hann gat ekki ekið bílnum og hætti keppni. Titilvonir Rosberg eru þar með orðnar að nánast engu.

„Inngjöfin kom alltaf nær og nær mér, á endanum þurfti ég að lyfta fætinum af í heild sinni. Þá var stýrið fyrir mér. Þá gat ég ekki sleppt inngjöfinni alveg. Þá varð ég að stoppa,“ sagði Rosberg sem var að vonum vonsvikinn.

Romain Grosjean lenti í harkalegum árekstri á 12. hring. Öryggisbíllinn var aftur kallaður út og margir notuðu tímann til að taka þjónustuhlé.

Vettel stal þriðja sætinu af Raikkonen í endurræsingunni. Vettel komst svo fram úr Bottas með því að taka leiftursnöggt þjónustuhlé á hring 31. Raikkonen lenti rétt fyrir aftan Bottas.

Baráttan um þriðja sætið var afar jöfn og spennandi. Perez, Bottas, Ricciardo og Raikkonen áttu allir möguleika.

Force India tók þjónustuhlé snemma fyrir Perez það skóp tækifæri hans á verðlaunasæti. Hann þurfti að spara dekkin verulega síðustu 10 hringina til að eiga möguleika.

Bottas og Raikkonen tóku fram úr Perez í einni beygju á næst síðasta hring. Raikkonen og Bottas lentu svo í samstuði og töpuðu þriðja sætinu aftur til Perez. Bottas gat ekki haldið keppninni áfram. Raikkonen endaði fimmti.

Carlos Sainz snéri Toro Rosso bílnum á hring 47 og afturendi bílsins endaði á varnarvegg. Afturvængurinn brotnaði og hann hætti keppni. Ricciardo hætti keppni hring seinna á Red Bull bílnum, fjöðrunin virtist hafa gefið sig.

Hér fyrir neðan má finna öll helstu úrslit helgarinnar á gagnvirku brautarkorti.