Sebastian Buemi vann í Kína

Sebastian Buemi á Renault E.Dams vann fyrstu keppni Formúlu E tímabilsins sem fór fram í Peking í morgun. Lucas di Grassi varð annar á Abt Schaeffler Audi og Nick Heidfeld á Mahindra varð þriðji.

Renault E.Dams náði að koma báðum bílum sínum á fremstu röð ráslínunnar í tímatökunni í morgun. Nicolas Prost var í þriðja sæti þegar hann þurfti að hætta keppni með brotinn afturvæng.

Simona de Silvestro á Andretti endaði sinn dag á varnarvegg og tímabundinn 50 km/klst hámarkshraði var settur á brautinni á meðan bíll hennar var fjarlægður.

Keppnin var 26 hringir á götum Peking fyrstu þjónustuhléin voru tekin við lok 13. hrings. Jacques Villeneuve á Venturi lenti í samstuði við Antonio Felix da Costa á Aguri bílnum. Costa veifaði afsökunarbeiðni til Villeneuve og hélt áfram en Villeneuve sat eftir, hægra framdekkið hékk af bílnum.

Robin Frjins á Andretti var beðinn um að reyna að ná Daniel Abt á Abt Schaeffler Audi bílnum. Svarið var einfalt: „Ég er að vinna í því.“

Prost þurfti að koma inn á þjónustusvæðið með brotinn afturvæng á Renault bílnum. Hann var flaggaður úr keppninni, enda á óöruggum bíl að mati dómara keppninnar.

Loic Duval á Dragon bílnum gerði allt sem hann gat til að ná þriðja sætinu af Heidfeld en hann hafði ekki verðlaunasætið af kempunni.

„Þetta var góð keppni, mér leiðist ekkert að vinna með smá bil í næsta bíl. Ég hélt ég væri á annarri áætlun en aðrir en svo var ekki. Ég skipti um bíl á saman hring og flestir aðrir,“ sagði Buemi eftir keppnina.