Kíkja á allt það heitasta

„Þetta er frétta- og skemmtiþáttur, þar sem við flytjum hressar og skemmtilegar fréttir á myndbandaformi,“ segir Davíð Arnar Oddgeirsson, en hann hefur ásamt Ósk Gunnarsdóttur umsjón með nýjum þætti sem ber nafnið Sumarlífið.

Þættirnir verða sýndir á Lífinu á Vísi og fer fyrsti þátturinn í loftið á föstudag. „Við ætlum kíkja á alla heitustu viðburðina tengda tónlistar- og menningarlífi í sumar. Fólk vill sjá lifandi myndir og hefur gaman af því að innbyrða fréttina á formi myndbands,“ segir Ósk.

Fyrsti viðkomustaðurinn er útgáfutónleikar Gísla Pálma sem fram fara í kvöld og verða í þættinum skemmtileg myndskeið og viðtöl af tónleikunum. „Við munum kíkja á bak við tjöldin og taka skemmtileg viðtöl.“

The Colur Run, uppistand með Jason Rouse og Secret Solstice-tónlistarhátíðin eru á meðal þeirra viðburða sem heimsóttir verða á næstunni.

Ósk og Davíð eru bæði ákaflega hress og með puttann á púlsinum þannig að búast má við frábærum þáttum hjá þeim í sumar.

Þættirnir eru unnir af Mint Production í samstarfi við 365 miðla og sér Arnar Þór Þórsson um upptökur. Mint Production framleiddi þættina Illa farnir, sem áttu góðu gengi að fagna allan síðasta vetur.