Heimir: Sagt í hvert skipti sem við mætum Dönum

Ísland og Danmörk leiða saman hesta sína í vináttulandsleik í Herning í kvöld. Þetta er fjórði síðasti leikur íslenska landsliðsins fyrir stóru stundina, EM í Frakklandi sem hefst 10. júní næstkomandi. Eftir leikinn við Dani færir íslenska liðið sig um set til Grikklands þar sem það mætir heimamönnum á þriðjudaginn.

„Mér finnst andinn í hópnum góður og menn eru ferskir,“ sagði Heimir Hallgrímsson landsliðsþjálfari í samtali við Fréttablaðið í gær. Að hans sögn eru allir leikmenn íslenska liðsins klárir í bátana að undanskildum Ólafi Inga Skúlasyni sem glímir við meiðsli aftan í læri.

Heimir kveðst nokkuð ánægður með stöðuna á íslenska hópnum, sé litið til leikforms og spilamennsku landsliðsmannanna.

„Já, já, við erum það. Við höfum sagt í aðdraganda leiksins að það séu margir leikmenn sem eru að minna á sig þessa stundina og standa sig vel með sínum félagsliðum. Bæði leikmenn sem eru með okkur hér og svo aðrir sem voru ekki valdir í þennan hóp. Það segir mér að við séum að gera eitthvað rétt í íslenskum fótbolta,“ sagði Heimir.

Nýi þjálfarinn stemningsþjálfari

Leikurinn í kvöld verður sá fyrsti hjá Dönum undir stjórn Norðmannsins Åge Hareide sem tók við landsliðinu af Morten Olsen sem stýrði því í 15 ár. Hareide er reyndur kappi en áður en hann tók við danska landsliðinu var hann við stjórnvölinn hjá Malmö.

Heimir býst því við breyttum leikstíl hjá danska liðinu frá því sem var undir stjórn Olsens. Hann segir þó að íslenska liðið einbeiti sér takmarkað að andstæðingnum í þessum leikjum en Grikkir eru, líkt og Danir, með nýjan þjálfara.

„Við leggjum ekki of mikla áherslu á andstæðinginn. Við vitum svo sem hvernig týpa Hareide er. Danirnir verða örugglega mun aggressívari og beinskeyttari en þeir voru hjá Olsen. Hareide er svona stemningsþjálfari og fær menn til að berjast og hlaupa,“ sagði Heimir.

Spila gegn þremur miðvörðum

Talsverðar líkur eru á því að Danir spili með þrjá miðverði í kvöld og sú gæti einnig orðið raunin gegn Grikkjum á þriðjudaginn. Heimir segir að þessir tveir leikir gætu því verið góð æfing fyrir íslenska liðið að spila gegn þriggja miðvarða leikkerfi, en ekki er ólíklegt að lið á EM muni grípa í það gegn Íslandi sem spilar alla jafna með tvo framherja.

„Við höfum ekki spilað við margar þjóðir sem hafa notað þrjá miðverði. Það verður spennandi að sjá hvort það breyti einhverju fyrir okkur og það verður fínt að fá æfingu í því núna,“ sagði Heimir.

Ísland hefur ekki riðið feitum hesti frá viðureignum sínum við Dani í gegnum árin og raunar bíða Íslendingar enn eftir fyrsta sigrinum gegn gömlu herraþjóðinni.

Sagt í hvert skipti

„Ætli þetta sé ekki sagt í hvert skipti sem við spilum við þá,“ sagði Heimir og hló, aðspurður hvort það væri ekki kominn tími til að vinna Dani. „Við viljum vinna þennan leik. Við höfum ekki unnið marga sigra í vináttulandsleikjunum eftir að undan­keppni EM lauk. Það er kominn tími á það að við vinnum leik.“

Leikurinn í kvöld er líka merkilegur fyrir þær sakir að þetta er í fyrsta sinn sem Ísland mætir Danmörku og er ofar á styrkleikalista FIFA.

„Ég held að það sé enginn að springa úr ofmati þótt við séum fyrir ofan þá í augnablikinu. Ég hugsa nú að Danir telji sig vera betri knattspyrnuþjóð en Íslendinga og vonandi verður það þannig í huganum á þeim þegar þeir fara út á völlinn,“ sagði Heimir Hallgrímsson, annar landsliðsþjálfara Íslands, að endingu.