Jafntefli hjá Rúrik í fyrri umspilsleiknum

Rúrik Gíslason spilaði síðustu mínúturnar í 1-1 jafntefli Nurnberg gegn Eintracht Frankfurt í umspili um laust sæti í þýsku úrvalsdeildinni.

Þetta var fyrri leikur liðanna og leikið var í Frankfurt, en gestirnir komust yfir á 43. mínútu þegar Marco Russ gerði sjálfsmark.

Heimamenn náðu svo að jafna á 65. mínútu með marki Mijat Gacinovic og lokatölur urðu 1-1 jafntefli.

Rúrik kom inná sem varamaður á 89. mínútu, en síðari leikur liðanna fer fram á mánudaginn í Nurnberg.

Sigurliðið spilar í efstu deildinni í Þýskalandi á næstu leiktíð.