Bjarni með bakið upp við vegg og mætir næst Valsmönnum sem elska Frostaskjól

Bjarni Guðjónsson, þjálfari KR, er ekki vinsælasti maðurinn í vesturbænum þessa stundina eftir að liðið tapaði fyrir 1. deildar liði Selfoss, 2-1, í framlengdum leik í 32 liða úrslitum Borgunarbikarsins í gær.

Bjarni mætti með sitt sterkasta lið til leiks en KR komst yfir í leiknum á 61. mínútu. Selfyssingar jöfnuðu metin tíu mínútum síðar og hinn 19 ára gamli Arnar Logi Sveinsson tryggði Selfossi svo sigurinn á 116. mínútu í framlenginu.

Sjá einnig:Twitter logar eftir úrslitin í Vesturbænum: Er Selfoss að vinna KR eða er mig að dreyma?

Þetta er í fyrsta sinn sem KR-ingar falla úr leik í 32 liða úrsiltum og enn fremur í fyrsta sinn í 24 ár sem vesturbæjarstórveldið, sigursælasta félag Íslands bæði í deild og bikar (14 bikarmeistaratitlar), tapar fyrir liði úr neðri deildum í bikarkeppni.

KR-ingar hafa engan húmor fyrir svona árangri en Páll Sævar Guðjónsson, rödd KR sem lýsti leiknum gegn Selfossí KR-útvarpinu í gærkvöldi, var bálreiður þegar flautað var til leiksloka. Hann sagði þessi úrslit vera skandal og velti fyrir sér hvort KR-ingar myndu sjá þjálfarabreytingar á næstunni.

1 - Í fyrsta sinn dettur KR úr leik í 32-liða úrslitum bikarkeppni KSÍ [21 leikur í 32 liða úrslitum alls].

— KR Tölfræði (@KRstats) May 25, 2016

Frábærir í vor

Byrjun KR-liðsins í sumar hefur verið döpur en það er í áttunda sæti í Pepsi-deildinni eftir fimm umferðir þar sem það hefur aðeins unnið einn leik og skorað fjögur mörk. Í heildina er KR aðeins búið að vinna einn leik af sex í sumar í deild og bikar og skora fimm mörk.

KR-liðið kom inn í mótið á fljúgandi siglingu eftir frábært undirbúningstímabil þar sem það vann hvern leikinn á fætur öðrum þegar nær dró Íslandsmóti. Það raðaði inn mörkum og fékk ekkert á sig og stóð uppi sem Lengjubikarmeistari eftir 2-0 sigur á Víkingi í úrslitaleik.

Það má ætla að Bjarni Guðjónsson, þjálfari KR, sé kominn með bakið upp við vegg eftir þessa döpru byrjun vesturbæjarliðsins og þá staðreynd að liðið kastaði frá sér toppsætinu um mitt mót í fyrra og endaði í þriðja sæti. Liðinu gekk einnig afar illa að skora seinni hluta móts í fyrra.

Bjarni fær ekki auðveldasta leikinn til að koma KR-ingum aftur í gang. Þvert á móti. Næsti leikur KR er á móti Val á Alvogen-vellinum. Valsmenn eru búnir að vinna þrjá síðustu leiki af fjórum í deild og bikar og virðast vera að komast á skrið.

Einn sigur á tíu árum

Valsmenn elska líka að spila í Frostaskjóli en þeir hafa í síðustu tíu útileikjum gegn KR aðeins tapað einu sinni. Síðast vann KR heimaleik gegn Val meistaraárið 2013 en þar var Bjarni Guðjónsson ónotaður varamaður.

Þar á undan vann KR heimaleik gegn Val í efstu deild árið 2005 en þá var Bjarni ekki kominn í Vesturbæinn. Hann hefur því aldrei upplifað heimasigur gegn Val í efstu deild þar sem hann tók einhvern þátt í leiknum.

KR gekk afar illa með Valsmenn Ólafs Jóhannessonar á síðustu leiktíð. Valur pakkaði KR saman, 3-0, á Valsvellinum þar sem KR hefur gengið álíka vel og Val í Vesturbænum. Þegar liðin mættust svo í úrslitaleik Borgunarbikarsins á Laugardalsvelli í fyrra vann Valur sannfærandi 2-0 sigur.

Þegar KR og Valur mættust í vesturbænum á síðustu leiktíð gerðu liðin jafntefli, 2-2, þar sem Almarr Ormarsson bjargaði stigi fyrir þá svarthvítu á 90. mínútu. Gary Martin, Baldur Sigurðsson og Emil Atlason skoruðu mörkin í síðasta sigri KR gegn Val á heimavelli fyrir þremur árum en enginn þeirra spilar með KR í dag.

Stuðningsmenn KR vilja vafalítið sjá KR-liðið og Bjarna svara gagnrýnisröddum og koma sér á skrið á ný með sigri á Val á sunnudaginn en sagan er að minnsta kosti ekkert að hjálpa liðinu fyrir leikinn. Til allrar hamingju fyrir Bjarna hefur sagan ekki enn þá unnið fótboltaleik.

Leikur KR og Vals verður í beinni útsendingu á Stöð 2 Sport HD klukkan 19.30 á sunnudaginn.

Síðustu tíu heimaleikir KR gegn Val í efstu deild:

2015: KR - Valur 2-2

2014: KR - Valur 1-2 (Gervigrasinu í Laugardal)

2013: KR - Valur 3-1

2012: KR - Valur 2-3

2011: KR - Valur 1-1

2010: KR - Valur 1-2

2009: KR - Valur 3-4

2008: KR - Valur 1-2

2007: KR - Valur 0-3

2006: KR - Valur 1-1

KR-sigrar: 1

Jafntefli: 3

Valssigrar: 6

Bjarni lagði allt i rúst hja Fram, óskiljanlega fekk hann starfið hja KR og er a góðri leið með að gera það sama #bjarniout#fotboltinet

— Óskar G Óskarsson (@Oggi_22) May 25, 2016

48 - Bjarni Guðjóns er með 48% vinningshlutfall í Pepsí með KR (13/27) og lið hans skorað að meðaltali 1.48 mörk í leik. (40/27) #OptaVIP

— Viðar Ingi Pétursson (@vidarip) May 25, 2016

Bæ bæ Bjarni?

— Heiðar Austmann (@haustmann) May 25, 2016