Gengur Keegan-kenningin upp?

Goðsögnin Kevin Keegan segir að Ísland muni endurtaka leik Dana frá 1992 og Grikkja frá 2004 og vinna EM í Frakklandi. Tólf ár liðu á milli sigra Danmerkur og Grikklands og samkvæmt því munstri ættu næstu Evrópumeistarar að koma úr óvæntri átt.

Kevin Keegan, fyrrverandi landsliðsfyrirliði og -þjálfari Englands, sagði á ráðstefnunni Business and Football, sem var haldin í Silfurbergi í Hörpu fyrir mánuði, að Ísland myndi fara alla leið á EM og vinna mótið. Svo sannarlega stór orð hjá þessum heillandi manni sem hefur svo mikla ástríðu fyrir fótboltanum.

Máli sínu til stuðnings vísaði Keegan til öskubuskuævintýra Danmerkur 1992 og Grikklands 2004 en þau fóru bæði alla leið og unnu EM. Tólf ár liðu þar á milli og nú tólf árum eftir sigur Grikkja væri röðin komin að Íslandi.

„Ég veit ekki hvernig þið munuð fara að því en Ísland mun vinna,“ sagði Keegan. Hvort þessum fyrrverandi handhafa Gullboltans var alvara eða ekki er erfitt að segja en kenning Keegans er áhugaverð.

Samkvæmt veðbönkum er íslenska liðið í 20. sæti yfir þau lið sem þykja líklegust til að vinna EM. Það eitt og sér er ágætis viður­kenning, að rúmlega 330.000 manna þjóð, sem er nýliði á stórmóti, sé líklegri en fjórar aðrar, þ.  á  m. Ungverjaland sem er með Íslandi í riðli, til að vinna EM.

Það er auðvitað afar fjarlægur draumur að Aron Einar Gunnarsson lyfti Henry Delaunay bikarnum á Stade de France 10. júlí næstkomandi og líklega verður Ástþór Magnússon kosinn forseti áður en það gerist.

En skrítnir hlutir hafa gerst á EM í gegnum tíðina og úrslitin þar eru ekki jafn fyrirsjáanleg og á HM. Til marks um það hafa níu þjóðir unnið 14 Evrópumót en átta þjóðir unnið 20 heimsmeistaramót.

Og voru danska liðið sem vann EM í Svíþjóð 1992 og gríska liðið sem varð Evrópumeistari tólf árum síðar virkilega betri en það íslenska? Danir voru með tvo leikmenn í heimsklassa, Peter Schmeichel og Brian Laudrup, en flestir hinna í hópnum spiluðu í heimalandinu. Svo átti danska liðið upphaflega ekki að vera með á EM 1992 en datt inn rétt fyrir mót vegna stríðsástandsins í gömlu Júgóslavíu. Þrátt fyrir það unnu Danir ríkjandi Evrópumeistara Hollands og ríkjandi heimsmeistara Þýskalands á leið sinni að Evrópumeistaratitlinum.

Grikkir voru ekki með nein stór nöfn í sínu liði og flestir leikmannanna voru lítt þekktir fyrir mótið. Samt tókst þeim að vinna gestgjafana (Portúgal) tvisvar, ríkjandi Evrópumeistara (Frakkland) og besta liðið (Tékkland) á leið sinni að titlinum. Grikkir fóru alla leið á mögnuðum varnarleik og frábæru skipulagi þýska þjálfarans Ottos Rehhagel.

Það þarf að sjálfsögðu allt að ganga upp í Frakklandi og rúmlega það ef íslenska liðið ætlar að skapa ævintýri eins og Danir gerðu fyrir 24 árum og Grikkir 12 árum. Lykil­menn þurfa að haldast heilir og spila óaðfinnanlega og skipulag og vinnusemi verður að vera til staðar. Svo þurfa hlutirnir auðvitað að falla aðeins með liðinu eins og þeir gerðu með Dönum og Grikkjum.

Möguleiki Íslands á að vinna EM 2016 er ekki mikill en hann er til staðar. Og kannski hefur Kevin Keegan rétt fyrir sér eftir allt.

Þessi grein birtist í EM-blaði Fréttablaðsins sem má finna allt hér.