Athyglin beinist svo sannarlega að strákunum okkar

Um eitt hundrað fjölmiðlamenn víðs vegar að úr Evrópu og frá fleiri heimshornum voru mættir tímanlega á æfingu strákanna okkar í Annecy í morgun til að taka þá tali. Vallarstarfsmenn klöppuðu fyrir okkar mönnum þegar þeir mættu og söknuðu þeirra greinilega en landsliðsstrákarnir fengu hvíldardag í gær. Sumir nýttu fríið í golfhring á meðan aðrir fóru í gislingu eða röltu um miðbæinn.

Landsliðsþjálfarinn Heimir Hallgrímsson segir að það hafi verið mikilvægt fyrir leikmenn að fá smá frí frá hótelinu, frí frá þjálfurunum og liðsfundum. Nú er það hins vegar alvaran á nýjan leik og nauðsynlegt að leikmenn haldi fókus þrátt fyrir alla athyglina í öllum heimshornum.

„Það er svo mikið hæp í kringum þetta. Ef þú ætlar að lesa allt það sem er skrifað um íslenska landsliðið eða hvern einasta leikmann mundi þér ekki duga dagurinn til þess. Ef við ætluðum að eyða öllum deginum í það að vera frægir þá erum við ekki að fókusa á það sem skiptir máli,“ segir Heimir. Nú þurfi að einbeita sér alfarið að Frakklandsleiknum.

Athyglin hefur ekki síst verið á Ragnari Sigurðssyni, miðverðinum úr Árbænum, sem er orðaður við ýmis félög eftir frábæra frammistöðu á mótinu, ekki síst gegn Englandi í Nice. Ragnar telur ekkert til í orðrómi um áhuga Liverpool, félagsins sem miðvörðurinn hefur stutt frá unga aldri, en segist geta nýtt sér athyglina til hvatningar.

„Þetta er aukahvatning fyrir mig. Það er gaman að fá viðurkenningu fyrir það sem maður er að gera og þá langar mann að leggja enn harðar að sér.“

Lars Lagerbäck minntist á það á fundi með blaðamönnum í gær að hann hefði þurft að áminna nokkra leikmenn í fyrrakvöld sem mættu of seint í kvöldmat. Liðið þyrfti að sýna 100 prósent fagmennsku innan sem utan fallar.

„Ef menn eru að verða eitthvað „sloppy“ eða eru að að skíta upp á bak verður aðeins að skamma okkur,“ segir Ragnar.

„Það hefur komið nokkrum sinnum fyrir að menn gleyma hinu eða þessu. Þá verður alvöru kall eins og hann að skamma okkur aðeins.“

Hann segir að viðbrögð manna í landsliðinu við því séu mismunandi.

„Sumir spá í þessu og aðrir ekki. Sumum er alveg sama. En við þurfum að hafa ákveðnar reglur eða „guidelines“ eins og það er kallað hjá okkur. Það þýðir ekki að allir eru að fara í mismunandi áttir bara af því að við höfum unnið nokkra leiki.“

Strákarnir æfðu í um einn og hálfan tíma í Annecy í hádeginu og framundan eru fundir með þjálfurunum í dag og í kvöld þar sem leikur Frakka verður kynntur fyrir þeim. Liðið æfir aftur á morgun, föstudag, og svo á laugardagsmorgun áður en haldið verður á vit átta liða úrslitanna í París. 

Strákarnir eiga góðar minningar frá Stade de France þar sem okkar menn tóku Austurríki 2-1 eins og frægt er orðið.