Prost vann en Buemi varð heimsmeistari

Sebastien Buemi var á ráspól eftir tímatökuna í morgun. Keppinautur hans, Lucas di Grassi var þriðji á ráslínunni á eftir liðsfélaga Buemi, Nicolas Prost há Renault e.Dams.

Buemi jafnaði di Grassi að stigum fyrir keppnina með því að ná ráspól en fyrir það fékk hann þrjú stig, sem var einmitt bilið á milli þeirra eftir keppni gærdagsins.

Buemi og di Grassi lentu í samstuði á leiðinni inn í þriðju beygju. Buemi bremsaði fyrr en di Grassi gerði ráð fyrir og báðir þurftu að skipta um bíl. Upphófst ein furðulegasta lokakeppni sögunnar.

Buemi og di Grassi voru augljóslega ekki að fara að klára keppnina. Rafhlöðurnar endast ekki nógu lengi til að klára keppnina frá því sem komið var.

Þá var eina ráðið að keppa um hraðasta hring keppninnar en fyrir hann fást tvö stig. Þetta var vægast sagt ótrúleg þróun á síðustu keppni tímabilsins.

Keppinautarnir um heimsmeistaratitil ökumanna biðu á þjónustusvæðinu eftir því að brautin næði kjöraðstæðum til að setja hraðasta hringinn. Buemi náði að setja hring sem di Grassi gat ekki svarað og tryggði sér þar með heimsmeistaratitilinn.

Öryggisbíllinn kom út á 13. hring, þegar Robert Frijns á Andretti bílnum lenti í samstuði við Loic Duval á Dragon racing, sem lokaði á Frijns og þrýsti honum út í varnarvegg.

Prost leiddi keppnina nokkuð örugglega fyrir Renault e.Dams. Daniel Abt var annar á ABT Audi og Jerome d´Ambrosio á Dragon varð þriðji.