Rory McIlroy ætlar ekki einu sinni að horfa á golfið á ÓL í Ríó

Bestu kylfingar heims keppast nú við að sjá til þess að golf verði ekki framtíðaríþrótt á Ólympíuleikunum. Það er þó einn sem hefur vinninginn.

Norður-Írinn Rory McIlroy er einn af fjórum bestu kylfingum heims samkvæmt heimslistanum sem allir hafa tilkynnt að þeir fari ekki til Ríó.

Rory McIlroy gekk hinsvegar einu skrefi lengra en hinir og sagðist ekki einu sinni ætla að horfa á golfkeppnina á Ólympíuleikunum.

Þetta er enn athyglisverðara því í viðtali í febrúar var Rory McIlroy að tala um að það yrði mjög svalt að vinna Ólympíugull og þetta væri eins og fimmta risamótið.

Rory McIlroy og félagar úr hópi bestu kylfingum heims haga notað Zika-veiruna sem afsökun en þeir eru allir ungir og að hugsa um að fjölga í fjölskyldunni.

Nú er aftur á móti komið allt annað hljóð í skrokkinn og Rory McIlroy segist ekki finna fyrir nokkurri pressu um að taka þátt í leikunum til að hjálpa golfíþróttinni. Honum er alveg sama um slíkt.

„Þetta var ekki eins erfið ákvörðun fyrir mig og hún var örugglega fyrir Jordan Spieth. Mér líður ekki eins og ég hafi brugðist íþróttinni. Ég fór ekki í golf með það markmið að breiða út fagnaðarerindið. Ég fór í golf til að vinna mót," sagði Rory McIlroy og peningarnir spilla nú örugglega ekki fyrir heldur.

„Ég er mjög ánægður með mína ákvörðun. Ég sé ekki eftir neinu. Ég mun örugglega horfa á Ólympíuleikanna en ég býst ekki við að horfa á golfið. Ég mun horfa á frjálsarnar, dýfingarnar og það sem skiptir einhverju máli," sagði Rory McIlroy á blaðamannafundi fyrir opna breska meistaramótið sem hefst á morgun.

Hvernig fólk og þá sérstaklega kylfingar og fólk tengt golfinu tekur þessi innleggi frá einum besta kylfingi heims er hinsvegar allt annað mál.