Stórkostlegur hrekkur hjá stuðningsmönnum Dinamo

Forkólfar Steaua frá Búkarest voru rauðir af reiði fyrir leik liðsins gegn Man. City í Meistaradeildinni í gær.

Það eru liðin 30 ár frá því að Steaua varð Evrópumeistari og því átti að fagna fyrir leikinn með því að láta áhorfendur búa til mosaík-mynd í stúkunni.

Er áhorfendur lyftu upp skiltunum stóð: „Doar Dinamo Bucuresti“ eða „Aðeins Dinamo Búkarest“.

Dinamo og Steaua eru erkifjendur og þetta gat því ekki verið mikið neyðarlegra fyrir Steaua. Jafnvel neyðarlegra en 5-0 tapið í leiknum sjálfum.

Hópur af stuðningsmönnum Dinamo hafði boðið fram aðstoð sína í að raða upp spjöldunum og þannig náðu þeir að gera Steaua þennan grikk.

Verður áhugavert að sjá hvort Steaua nái að hefna sín á svipaðan hátt.