Stíflan brast loksins hjá Brössum

Brasilíumönnum tókst loksins að skora í þriðja leik sínum á Ólympíuleikunum í Ríó.

Brasilía mætti Danmörku í lokaleik sínum í A-riðli og eftir markalaus jafntefli í fyrstu tveimur leikjunum hrukku Brassar loks í gang.

Gabriel „Gabigol“ Barbosa skoraði tvö mörk fyrir Brasilíu og þeir Gabriel Jesus og Luan sitt markið hvor.

Brasilía vann riðilinn með fimm stig og Danir fóru áfram með þeim. Í hinum leik riðilsins gerðu Írak og Suður-Afríka markalaust jafntefli. Hvorugt liðanna komst áfram í 8-liða úrslit.

Í B-riðli tryggði Kólumbía sér sæti í 8-liða úrslitunum með 2-0 sigri á Nígeríu. Tapið breytti litlu fyrir Nígeríumenn sem unnu riðilinn með sex stig. Kólumbía kom næst með fimm stig.

Í hinum leik riðilsins vann Japan 1-0 sigur á Svíþjóð. Bæði lið sátu eftir.

Í 8-liða úrslitunum sem hefjast á laugardaginn mætir heimaliðið, Brasilía, Kólumbíu, Suður-Kórea og Hondúras eigast við, Þýskaland mætir Portúgal og Nígería leikur gegn Danmörku.