Tæplega fimmtungi fleiri farþegar

Í ágúst flutti Icelandair Group 484 þúsund farþega í millilandaflugi og voru þeir 17 prósentum fleiri en í ágúst í fyrra. Sætanýtingin var 87,5 prósent samanborið við 89,1 prósent í ágúst í fyrra. Framboðsaukning á milli ára nam 22 prósentum, segir í tilkynningu.

Farþegar í innanlandsflugi og Grænlandsflugi voru 36 þúsund í ágúst. Framboð félagsins jókst um 17 prósent samanborið við 2015. Sætanýting nam 71,4 prósentum og lækkaði um 6,3 prósentustig á milli ára. Skýrist það af minni eftirspurn eftir flugi til Grænlands en ráðgert var.

Seldir blokktímar í leiguflugi voru 9 prósent færri en á síðasta ári. Fraktflutningar jukust um 5 prósent frá því á síðasta ári. Seldum gistinóttum á hótelum félagsins fjölgaði um 11 prósent á milli ára. Herbergjanýting var 90,3 prósent samanborið við 88,8 prósent í ágúst í fyrra.