Báðar súperstjörnurnar með nýjan samning hjá Real

Enskir og spænskir fjölmiðlar eru mjög duglegir að velta sér upp úr framtíðinni hjá súperstjörnum Real Madrid liðsins en nú lítur út fyrir að tveir af bestu leikmönnum heims ætli að spila áfram á Santiago Bernabéu.

Cristiano Ronaldo og Gareth Bale hafa báðir gengið frá nýjum samningum við Real Madrid ef marka má fréttir frá Spáni en þeir hafa báðir sem dæmi verið ítrekað orðaðir við lið Manchester United.

Real Madrid hefur ekki gert nýju samningana opinbera en útvarpsstöðin Cope á Spáni hefur heimildir fyrir því að báðir leikmennirnir séu búnir að skrifa undir.

Real Madrid hefur samkvæmt fréttum frá Spáni boðið Gareth Bale 91 milljón punda samning til að koma í veg fyrir að hann vilji fara til Manchester United næsta sumar.

Cristiano Ronaldo hefur aftur á móti gert samning til ársins 2021 en hann verður þá orðinn 36 ára gamall og líklega kominn nálægt endastöð á ferlinum.

Svona samningur ætti jafnframt að loka á þann möguleika á að Ronaldo fari til Kína eða í bandarísku deildina sem hefur hingað til þótt vera líklegt næsta skref fyrir Portúgalann.

Cristiano Ronaldo hefur verið orðaður við sitt gamla félag Manchester United alveg eins og Bale en hann og Jose Mourinho þekkjast vel síðan Portúgalarnir unnu saman hjá Real Madrid.

Miðjumennirnir frábæru, Toni Kroos og Luka Modric, eru einnig að bíða eftir því að ganga frá nýjum samning við Real Madrid og gangi þetta allt í gegn er ljóst að kjarni Real Madrid liðsins mun haldast óbreyttur næstu árin.