„Drekasvæðið mun betra en við þorðum að vona“

Nýjar rannsóknir á Drekasvæðinu benda til að þar séu stærri olíulindir en menn höfðu áður þorað að vona, að sögn stjórnarformanns Eykons, Heiðars Guðjónssonar. Sérleyfishópur undir forystu kínversks ríkisolíufélags stefnir á fyrstu boranir árið 2020. Fjallað var um málið í fréttum Stöðvar 2.

Tveir hópar eru með sérleyfi til olíuleitar á svæðinu og hafa báðir sent rannsóknarskip til tvívíðra bergmálsmælinga. Skip á vegum kínverska félagsins CNOOC fór þangað í fyrrahaust en fulltrúar hópsins funduðu nýlega í Peking um fyrstu niðurstöður leiðangursins og næstu skref. Fundinn sátu einnig fulltrúar Orkustofnunar, norska ríkisolíufélagsins Petoro og íslenska félagsins Eykons.

Í ljósi stöðunnar á olíumörkuðum heims og þess hversu langt verður að sækja olíu á Drekasvæðið hefði allt eins mátt búast við að fréttirnar yrðu núna á þá leið að menn ætluðu að hætta við. En það er þvert á móti. Stjórnarformaður Eykons, Heiðar Guðjónsson, segir niðurstöður mælinganna í fyrrahaust betri en menn bjuggust við. 

„Svæðið er þannig að olíugeymslur, sem þarna geta verið, eru stórar. Þetta svæði er engu minna lofandi heldur en svæði í kringum Bretland eða Noreg.“ 

-Hvað þýðir þetta um framhaldið? 

„Þetta þýðir það að við höldum áfram að vinna úr gögnunum eins hratt og við megum og getum. Við verðum búnir að því svona um mitt næsta ár. Þá er farið að bjóða út þrívíðar rannsóknir.“ 

Þær hafa þann tilgang að undirbúa borun. 

„Þetta gefur það til að kynna að það verði borað í kringum árið 2020,“ segir Heiðar.

„En það sem er gleðilegt við þetta er að svæðið er miklu betra heldur en við höfum þorað að vona. Það í raun gerir það að verkum að hagur Íslands er betri vegna þess að það eru nú Íslendingar sem fá meirihluta af því sem þarna kemur.

Vegna þess að skatttekjurnar eru slíkar að það fer vel yfir helming af því sem kemur. Þannig að þetta eru bara mjög góðar fréttir fyrir alla,“ segir stjórnarformaður Eykons. 

Fjallað er um niðurstöður fundarins í Peking á vef Orkustofnunar.