Rosberg: Möguleikar mínir á morgun eru fínir

Lewis Hamilton náði sínum tíunda ráspól á tímabilinu í dag. Hann tók þar með stórt skref í áttina að því að minnka forskot Nico Rosberg í heimsmeistarakeppni ökumanna. Hver sagði hvað eftir tímatökuna?

„Það er auðvitað alltaf erfitt að ná góðum tímatökuhring. Dekkin gera okkur erfitt fyrir. Brautin er hál en hún er miklu betri en í fyrra. Þap er frábært að sjá allt þetta fólk hérna,“ sagði Hamilton.

„Lewis átti frábæran hring, minn var ekkert svo sérstakur í samanburði við hans. Möguelikar mínir á morgun eru þó fínir. Helgin byrjaði hægt hjá mér en ég er að ná áttum,“ sagði Nico Rosberg.

„Tímatakan gekk vel, mér finnst bíllinn hafa verið góður alla helgina. Við náðum ekki alveg að láta hringinn smella í þriju lotunni,“ sagði Max Verstappen.

„Vonandi getum við strítt báðum Mercedes mönnum í ræsingunni á morgun. Ég náði öðrum þeirra síðustu helgi, vonandi get ég náð báðum á morgun. Ég er frekar hissa á að ég hafi endað svona nálægt ráspól,“ sagði Daniel Ricciardo sem verður fjórði á Red Bull bílnum á ráslínunni á morgun.

„Ég held að við hefðum geta komist í aðra lotu tímatökunnar. Svona gerist en þetta er afar svekkjandi. Tímatökurnar hafa gengið vel að undanförnu. Við þurfum þá að berjast á morgun í staðinn. Ég hefði gjarnan viljað sýna hvað ég get,“ sagði Jolyon Palmer sem tók ekki þátt í tímatökunni og ræsir af þjónustusvæðinu á morgun.

„Þetta var sennilega besta staðan sem við gátum óskað okkur í dag. Við höfum val um keppnisáætlanir á morgun. Svo lengi sem ég klára á undan Jenson þá er ég ánægður,“ sagði Fernando Alonso sem ræsir 11. á McLaren bílnum á morgun.

Jenson Button, liðsfélagi Alonso kom og truflaði viðtalið við Alonso liðsfélagarnir grínuðust með að lenda kannski í árekstri í fyrstu beygju.

„Við náðum skilningi á hegðan dekkjanna. Hringurinn var líka einstakur. Maður þarf alltaf að vanda sig í ræsingunni og reyna að forðast vandræði. Ég held að við ættum að vera í góðri stöðu eftir ræsinguna á morgun,“ sagði Nico Hulkenberg sem ræsir fimmti á morgun á Force India bílnum.

„Við vorum bara ekki nógu fljótir. Það sem skiptir máli í dag eru úrslitin og þau voru ekki góð hjá okkur,“ sagði Sebastian Vettel sem varð sjöundi á Ferrari í tímatökunni.