Ísland mætir Írlandi í Dublin í lok mars

Íslenska karlalandsliðið í fótbolta mætir því írska í vináttulandsleik 28. mars 2017.

Leikurinn fer fram á Aviva leikvanginum í Dublin en hann tekur rúmlega 50.000 áhorfendur.

Fjórum dögum áður, 24. mars, sækir Ísland Kósovó heim í undankeppni HM 2018. Það verður fimmti leikur íslensku strákanna í undankeppninni.

Ísland og Írland hafa mæst 10 sinnum á fótboltavellinum. Írar hafa unnið sjö leiki og þrír leikir hafa endað með jafntefli.

Nítján ár eru liðin frá því Ísland og Írland mættust síðast. Það var í undankeppni HM 1998, á Laugardalsvellinum 6. september 1997. Írar höfðu betur, 2-4, og skoraði Roy Keane tvö af mörkum Íra. Hann er í dag aðstoðarþjálfari írska landsliðsins.