Ricciardo: Vettel á ekki skilið að vera á verðlaunapallinum

Lewis Hamilton minnkaði forskot Nico Rosberg niður í 19 stig í heimsmeistarakeppni ökumanna með því að vinna mexíkóska kappaksturinn. Hver sagði hvað eftir keppnina?

„Nico stendur sig vel í því að halda þeim stöðum sem hann þarf að halda mig langar í sombreró hatt. Bíllinn var góður og liðið ótrúlegt,“ sagði Hamilton á verðlaunapallinum.

„Þetta var góður dagur, Lewis var of fljótur þessa helgi svo ég er nokkuð sáttur með að landa öðru sætinu,“ sagði Rosberg á verðlaunapallinum.

„Ég var að nota mikið táknmál. Auðvitað var adrenalínið á fullu og hann [Verstappen] fór út af og kom inná aftur fyrir framan mig,“ sagði Sebastian Vettel sem komst á verðlaunapallinn þegar Max Verstappen var refsað. Vettel kom fjórði í mark en tók sæti Verstappen eftir glannaleg tilþrif Verstappen.

„Ég held ég hafi ekkert að segja við Max. Tilfinningarnar eru miklar í bílnum og auðvitað fengu ýmis orð að fljúga. Það sem Max gerði var heimskulegt,“ bætti Vettel við.

„Vettel á ekki skilið að vera á verðlaunapallinum. Hann færði sig undir hemlun sem var bönnuð síðustu helgi. Eins var ræsingin skrýtin mér fannst óskýrt hvers vegna Lewis var ekki refsað eftir mistökin á leiðinni inn í fyrstu beygju. Hann gerði það sama og Max. Þeir áttu báðir skilið að fá refsingu. Ég hefði átt að vera þriðji enda átti að refsa Sebastian líka,“ sagði Daniel Ricciardo sem varð fjórði eftir refsingu Verstappen.

„Þetta atvik var svipað því sem gerðist í beygju eitt og ekki fékk Lewis neina refsingu. Liðið hélt að ég þyrfti að gefa stöðuna til Vettel en það var aldrei staðfest. Ég kann að verjast undir hemlun en það sem Sebastian gerði var vandræðalegt og hann kann ekki þessa vörn. Ég mun tala við Sebastian og reyna að skilja af hverju hann er svona pirraður. Hann er búinn að vera að garga svona dónalega í talstöðina alla helgina,“ sagði Max Verstappen sem varð fimmti eftir að fá fimm sekúndna refsingu eftir keppninna. Hann er sennilega umdeildasti maður dagsins.

„Ef ég hef einhverntíman séð einhvern hreyfa sig undir hemlun þá var það hjá Vettel þegar hann var að reyna að verjast Daniel,“ sagði Helmut Marko yfirmaður kappakstursmála hjá Red Bull.

„Við höfðum áhyggjur af þessari braut. Williams hafa verið sterkir hér en það er gott að ná að auka forskotið á þau um eitt stig. Ég náði öllu út úr bílnum,“ sagði Nico Hulkenberg sem varð sjöundi í dag á Force India bílnum.