Hæstu launin hjá Brimi

Hæstu launin árið 2015 meðal 300 stærstu fyrirtækja landsins voru hjá Brimi hf. Meðallaun fyrir árið námu 24,5 milljónum króna, eða rúmum tveimur milljónum á mánuði. Launin hækkuðu um 27 prósent milli ára, að því er kemur fram í Frjálsri verslun.

Næsthæstu launin voru hjá Bergi-Hugin en þar námu árslaun 21,5 milljónum króna. Þriðju hæstu voru hjá Stefni þar sem þau námu 20,7 milljónum og fjórðu hæstu hjá GAMMA þar sem þau námu 20,2 milljónum króna.

Samkvæmt nýjum lista Frjálsrar verslunar er Icelandair Group stærsta fyrirtæki landsins með yfir 150 milljarða króna í veltu. Umsvif félagsins jukust um 15 prósent á síðasta ári. Marel er í öðru sæti listans og velti um 120 milljörðum króna. Efstu tvö sætin breytast ekki milli ára, en Arion banki er í þriðja sæti með 118 milljarða króna veltu, samanborið við fimmta sæti í fyrra. Velta Arion banka jókst um ríflega þriðjung milli ára.

Viðskiptabankarnir eru fyrirferðarmiklir þegar kemur að hagnaði eftir skatt. Mestur hagnaður var hjá Arion banka en hann nam 49,7 milljörðum króna á síðasta ári. Hagnaður Landsbankans nam 36,5 milljörðum og hagnaður Íslandsbanka 20,6 milljörðum króna. Listinn um mestan hagnað breytist töluvert milli ára en Icelandair Group færist úr fyrsta sæti í það fjórða með 20,6 milljarða hagnað.

Hagnaður sem hlutfall af veltu var hæstur hjá Veritas Capital árið 2015, næsthæstur hjá Framtakssjóði Íslands og þriðji hæstur hjá Smáragarði.

Mesta eigið fé var hjá Landsbankanum en það nam 264,5 milljörðum og hækkaði um fimm prósent milli ára, næsthæst var það hjá Landsvirkjun þar sem það nam 248,4 milljörðum og hækkaði um 15 prósent milli ára. Þriðja mesta eigið fé var hjá Íslandsbanka þar sem það nam 202 milljörðum og hækkaði um níu prósent milli ára. Listi yfir mesta eigið fé breyttist verulega milli ára. Icelandair Group var með mest eigið fé á síðasta ári en er nú í 13. sæti.