Kári kallar eftir því að Katrín og Bjarni nái saman í ríkisstjórn

Kári Stefánsson, forstjóri Íslenskrar erfðagreiningar, kallar eftir því að Sjálfstæðisflokkurinn og Vinstri Græn mætist á miðri leið og taki saman þátt í næstu ríkisstjórn. Hann segir þá staðreynd að sjö flokkar séu nú á þingi endurspegla mikilvægi þess að næsta ríkisstjórn hýsi „alls konar skoðanir á ýmsum málum.“

Þetta kemur fram í grein Kára sem birtist í Fréttablaðinu í dag. Þar segir að landslagið í íslenskri pólítik sé nú annað en þegar fáir flokkar voru á þingi og auðvelt var að mynda sterka tveggja flokka stjórn líkt og hefð hefur verið fyrir í íslenskri stjórnmálasögu. Meiri líkur séu á því að hægt verði að skapa frið og sátt ef ríkisstjórnin endurspegli stærri hluta af skoðanarófi samfélagsins.

„Þess vegna viljum við hvorki hægri né vinstri ríkisstjórn heldur þá sem er jafnhent. Sú ríkisstjórn verður að hafa innbyrðis tvo stærstu stjórnmálaflokka landsins sem eru á sitthvorum endanum á þeirri línu sem við röðum pólitískri fílósófíu á,“ skrifar Kári.

Óhætt er að segja að hér eigi Kári við Sjálfstæðisflokkinn og Vinstri Græn en þessir flokkar eru tveir stærstu flokkar landsins eftir kosningarnar og yst til hægri og vinstri á hinu pólitíska litrófi.

Í gær var þó tilkynnt um að Sjálfstæðisflokkurinn, Björt framtíð og Viðreisn myndu hefja formlegar stjórnarmyndunarviðræður.

Í vikunni var einnig greint frá því að Katrín Jakobsdóttir, formaður VG, hefði greint Bjarna Benediktssyni, formanni Sjálfstæðisflokksins, frá því að hún teldi það mjög ólíklegt að viðræður þessara flokka um ríkisstjórnarsamstarf myndu skila árangri. Sjálfur sagði Bjarni við RÚV að útséð væri um samstarf við Vinstri græn eftir samtöl við flokkinn.

Að mati Kára er þetta ekki ásættanleg afstaða og aðeins þurfi „kraftinn sem felst í væntumþykju fyrir íslensku samfélagi til þess að beygja þessa línu í hring þannig að endarnir komi saman.“

„Það væri með öllu óásættanlegt ef þessir flokkar létu fílósófískan ágreining koma í veg fyrir stjórnarsamstarf vegna þess að á tímum smáflokkanna getur hver einstakur flokkur ekki haft áhrif á stjórn landsins án þess að vinna með þeim sem eru á öndverðum meiði um margt,“ skrifar Kári.

Þeir flokkar sem ekki hafa vilja og getu til þess að vinna með flokkum og einstaklingum sem eru á öndverðum meiði eigi á hættu á að hverfa af þingi.

„Það er hætt við því að sá stjórnmálaflokkur sem þróar ekki með sér viljann og getuna til þessa velkist í erindisleysi uns hans bíða þau örlög Samfylkingarinnar að það er ekki lengur hægt að spila bridge á þingflokksfundum.“