Tiger tekur risastökk á heimslistanum

Tiger Woods sneri aftur á golfvöllinn þegar hann tók þátt í Hero World Challenge, árlegu móti sem hann heldur sjálfur. Þetta var fyrsta mót Tigers í um 16 mánuði erfið meiðsli í baki hafa haldið honum frá keppni.

Tiger lék ágætlega á Hero World Challenge, á fjórum höggum undir pari og endaði í 15. sæti. Japanski kylfingurinn Hideki Matsuyama stóð uppi sem sigurvegari en hann lék á 18 höggum undir pari.

Frammistaða Tigers á mótinu skilaði honum upp um 248 sæti á heimslistanum. Tiger var í 898. sæti en er nú í sæti númer 650.

Nýsjálendingurinn Jason Day er áfram á toppi heimslistans. Norður-Írinn Rory McIlroy er í 2. sæti og Dustin Johnson frá Bandaríkjunum í því þriðja.

Tiger vildi ekkert tjá sig um hvenær hann tæki þátt á næsta móti.

„Mig dreymir um að spila á öllum mótum á næsta tímabili en ég þarf að skoða þetta. Ég mun setjast niður með sjúkraþjálfara mínum og reyna að styrkja mig og sjá til eftir það,“ sagði Tiger eftir mótið um helgina.