Viola Davis flutti tilfinningaþrungna þakkarræðu með tárin í augunum

Bandaríska leikkonan Viola Davis vann Óskarsverðlaunin í gær fyrir leik sinn í kvikmyndinni Fences. Hún flutti tilfinningaþrungna þakkarræðu með tárin í augunum við mikinn fögnuð viðstaddra í salnum en mydnin er byggð á leikriti August Wilson sem lést árið 2015. Davis fór með sama hlutverk í leikritinu þegar það var sýnt á Broadway fyrir nokkrum árum.

„Þið vitið að það er einn staður í heiminum þar sem allt fólkið sem hafði mestu möguleikana er samankomið og það er í kirkjugarðinum,“ sagði Davis í upphafi ræðu sinnar.

„Fólk spyr mig alltaf hvers konar sögur ég vilji segja og ég svara að ég vilji grafa upp þessi lík. Grafa upp þessar sögur, sögur af fólki sem átti sér stóra drauma en sá þá aldrei rætast, fólk sem varð ástfangið og tapaði. Ég varð listamaður og þakka guði fyrir að ég gerði það því við erum eina starfsstéttin sem fagnar því hvað það þýðir að lifa lífinu.“

Þetta var í þriðja sinn sem Davis var tilnefnd til Óskarsverðlauna en í fyrsta skipti sem hún vann þau. Hún var tilnefnd árið 2008 sem besta leikkona í aukahlutverki fyrir myndina Doubt og svo árið 2011 sem besta leikkona í aðalhlutverki fyrir myndina The Help.

Ræðu Violu má sjá hér að neðan.