Landsliðsmenn Kósóvó eiga landsleiki með sjö mismunandi þjóðum

Innan við ár er síðan að Kósóvó fékk fulla inngöngu í Alþjóðaknattspyrnusambandið, FIFA, og þar með heimild til að taka þátt í alþjóðlegum keppnum. Kósóvó mætir Íslandi í undankeppni HM 2018 í kvöld og fer leikurinn fram í nágrannalandinu Albaníu.

Stríðið á Balkansskaganum og langverandi átök í Kósóvó gerðu það að verkum að mikill fólksflótti var frá svæðinu til annarra landa í Evrópu. Af þeim sökum eru víða ungir knattspyrnumenn sem ólust að stærstum hluta í öðrum löndum að heiðra gamla föðurlandið með því að spila fyrir landslið Kósóvó.

Fjölþjóðlegur bakgrunnur 23 manna leikmannahóps Kósóvó fyrir leikinn gegn Íslandi í kvöld blasir við þegar hópurinn er skoðaður. Alls eiga átján leikmenn í hópnum landsleiki, ýmist A-landsleiki eða með yngri landsliðum, með samtals sjö öðrum þjóðum.

Sjá einnig: Framherjinn frá Schalke kominn með leikheimild og má spila á móti Íslandi í kvöld

Þar af eru átta sem hafa leikið með A-landsliðum annarra landa en flestir þeirra hafa spilað með Albaníu enda tengsl þessara tveggja landa afar náin. Margir íbúar Kósóvó líta raunar enn þann daginn í dag á landslið Albaníu sem þeirra eigið landslið og fjölmargir leikmenn albanska liðsins fæddust í Kósóvó eða eiga foreldra sem eru þaðan.

Þó eru sumir í núverandi landsliðshópi Kósóvó sem ákváðu að sækja um leikheimild með hinu nýja landsliði þegar það var sett á laggirnar. Meðal þeirra má nefna markvörðinn Samir Ujkani, sem einnig er fyrirliði Kósóvó, varnarmennina Amir Rrahmani og Fidan Aliti, miðjumanninn Milot Rashica og sóknarmanninn Besart Berisha.

Hér fyrir neðan má sjá þá leikmenn Kósóvó sem eiga landsleiki að baki með öðrum þjóðum.

Markverðir:

Samir Ujkani (Albanía A, U21)

Adis Nurković (Bosnía A, U21)

Varnarmenn:

Fanol Përdedaj (Þýskaland U21)

Leart Paqarada (Þýskaland U21, Albanía U21)

Amir Rrahmani (Albanía A, U21)

Fidan Aliti (Albanía A)

Mërgim Vojvoda (Albanía U21)

Miðjumenn:

Valon Berisha (Noregur A, U15-23)

Bersant Celina (Noregur U15-21)

Milot Rashica (Albanía A, U17-21)

Herolind Shala (Noregur U17-21, Albanía A, U21)

Arber Zeneli (Svíþjóð U17-21)

Hekuran Kryeziu (Sviss U17-21)

Framherjar:

Vedat Muriqi (Albanía U21)

Elba Rashani (Noregur U17-21)

Besart Berisha (Albanía A)

Atdhe Nuhiu (Austurríki U19-21)

Donis Avdijaj (Þýskaland U16-19)