Alfreð í byrjunarliði Augsburg sem tapaði mikilvægum fallslag

Alfreð Finnbogason lék sinn fyrsta leik í byrjunarliði Augsburg síðan 30. september þegar liðið tapaði 2-3 fyrir Ingolstadt á heimavelli í kvöld.

Íslenski landsliðsframherjinn hefur verið lengi frá vegna meiðsla en er allur að koma til og spilaði allan tímann í kvöld.

Alfreð og félagar lentu 0-3 undir en náðu að gera leikinn spennandi. Paul Verhaegh minnkaði muninn með marki úr vítaspyrnu á 76. mínútu og fimm mínútum síðar skoraði varamaðurinn Halil Altintop annað mark Augsburg.

Nær komust heimamenn hins vegar ekki og 2-3 sigur Ingolstadt staðreynd.

Þetta var dýrt tap fyrir Augsburg sem er í þriðja neðsta sæti þýsku úrvalsdeildarinnar. Ingolstadt er í því næstneðsta.