Evrópuævintýri Leicester lokið | Sjáðu mörkin

Evrópuævintýri Leicester City er lokið eftir 1-1 jafntefli við Atlético Madrid á King Power vellinum í seinni leik liðanna í 8-liða úrslitum Meistaradeildar Evrópu.

Atlético vann fyrri leikinn 1-0 og einvígið samanlagt 2-1. Þetta er í þriðja sinn á síðustu fjórum árum sem Atlético kemst í undanúrslit Meistaradeildarinnar.

Saúl Níguez gerði verkefni Leicester afar erfitt þegar hann kom Atlético yfir með skalla eftir fyrirgjöf Filipe Luís á 26. mínútu.

Craig Shakespeare, knattspyrnustjóri Leicester, gerði tvær breytingar á sínu liði í hálfleik og breytti auk þess um leikaðferð.

Þessar breytingar báru árangur því Leicester var sterkari aðilinn í seinni hálfleik. Ensku meistararnir náðu þó aðeins að skora eitt mark. Það gerði Jamie Vardy á 61. mínútu.

Lokatölur 1-1 og Atlético er komið undanúrslit.