Sara Björk í bikarúrslit

Sara Björk Gunnarsdóttir og stöllur hennar í Wolfsburg eru komnar í úrslit þýsku bikarkeppninnar eftir 1-2 útisigur á Freiburg í framlengdum leik í dag.

Sara Björk var í byrjunarliði Wolfsburg sem lenti undir á 19. mínútu.

Staðan var 1-0 í hálfleik og fram á 53. mínútu þegar Caroline Hansen jafnaði metin í 1-1. Fleiri urðu mörkin ekki í venjulegum leiktíma og því þurfti að framlengja.

Þar reyndist hin pólska Ewa Pajor hetja Wolfsburg en hún skoraði sigurmarkið á 96. mínútu.

Wolfsburg mætir Sand í úrslitaleiknum í Köln 27. maí næstkomandi. Wolfsburg hefur orðið bikarmeistari undanfarin tvö ár.