Raikkonen: Ég sé ekki af hverju við ættum ekki að geta unnið á morgun

Kimi Raikkonen náði fimmtugasta ráspól finnsks ökumanns í Formúlu 1 og Sebastian Vettel lokaði fremstu rásröðinni fyrir Ferrari. Hver sagði hvað eftir tímatökuna?

„Ég sé ekki af hverju við ættum ekki að geta unnið á morgun. Við þurfum að taka réttar ákvarðanir og tímasetja allt vel hjá okkur,“ sagði Raikkonen eftir tímatökuna.

„Uppstilling bílsins var ekki fullkomin, það er sennilega aldrei hægt að fullkomna hana hér. Ég er ánægður með daginn, bæði fyrir mig og liðið,“ sagði Raikkonen.

Raikkonen hefur þurft að bíða lengi eftir þessum ráspól. Hann hefur tekið þátt í 256 tímatökum og þar af eru 129 síðan hann náði ráspól í Frakklandi 2008. Það hefur því hálfur ferill Raikkonen farið í biðina eftir ráspólnum. Sem er nýtt met fyrir ökumann til að ná ráspól og þurfa svo að bíða eftir næsta ráspól.

„Mér er eiginlega alveg sama hvað varð um Hamilton. Ég var sennilega að ýta aðeins of mikið í síðustu lotunni. Að endingu er þetta frábær niðurstaða fyrir Ferrari,“ sagði Vettel sem varð annar í tímatökunni, 0,043 sekúndum á eftir Raikkonen.

„Þetta er ótrúleg tilfinning að aka hérna um með áhorfendur svona nálægt. Rauðu bílarnir voru aðeins of fljótir í dag. Ég er samt nokkuð ánægður með daginn,“ sagði Valtteri Bottas sem varð þriðji á Mercedes bílnum, 0,002 sekúndum á eftir Vettel.

„Við höfum verið að elta uppstillinguna á bílnum alla helgina. Hún hefur ekki verið betri en í tímatökunni og við gátum reynt að ógna Ferrari,“ sagði Bottas.

„Ég er mjög glaður fyrir hönd Kimi. Við sáum í dag glytta í meistarann sem er til í Kimi. Við viljum auðvitað standa okkur vel á morgun. Nú þurfum við að setja hausinn undir okkur og standa okkur á morgun,“ sagði Maurizio Arrivabene, liðsstjóri Ferrari.

„Ég var óheppinn með gula flaggið undir lokin. Ég held ég hefði kannski hugsanlega komist áfram í þriðju lotuna. Gott að sjá að Valtteri gat staðið sig vel og sýnt og sannað að við erum ekki ömurlegir hérna,“ sagði Lewis Hamilton sem endaði 14. í tímatökunni. Hamilton mun ræsa 12. eftir að McLaren menn hafa fengið sína refsingu.

„Ég hef notið helgarinnar fyrir utan þriðju lotuna. Ég hef verið að aka varkárnislega sem ég verð að gera þegar ég er að tippla í kringum Mónakó. Ég hef ekki saknað Formúlu 1,“ sagði Jenson Button sem varð níundi í tímatökunni en ræsir aftastur vegna refsinga sem hann fær fyrir vélaskipti.

„Við áttum góðan dag fyrir utan áreksturinn. Þetta gerist stundum þegar maður er að reyna sitt besta í Mónakó,“ sagði Stoffel Vandoorne sem ræsir 13. á morgun, þrátt fyrir að hafa endað 10. í tímatökunni. Hann þarf að taka út þriggja sæta refsingu eftir árekstur í Barselóna.