Segir aðgerðaleysi við lóðaúthlutanir í borginni hafa skapað mikinn vanda

Framsókn og flugvallarvinir hafa sett á dagskrá borgarstjórnarfundar í dag umræðu um lóðaúthlutanri í borginni á fyrstu þremur árum kjörtímabilsins á lóðum fyrir fjöleignarhús með fleiri en fimm íbúðum.

„Einstrengingsleg þéttingar- og lóðaskortsstefna meirihlutans í borginni hefur valdið miklum húsnæðisvanda og hækkun húsnæðisverðs. Fasteignafélögin hafa ráðið ferðinni í borginni á lóðum sem hafa verið í höndum þessara félaga eða banka í mörg ár enda hefur stefna meirihlutans verið sú að úthluta helst ekki fjölbýlishúsalóðum,“ segir Guðfinna Jóhanna Guðmundsdóttir, borgarfulltrúi Framsóknar og flugvallarvina.

Hún segir aðgerðaleysi meirihlutans í borginni varðandi lóðaúthlutanir hafa skapað mikinn vanda.

„Uppbygging hefur gengið hægt og eftirspurnin er langt umfram framboð sem hefur haft í för með sér hærra húsnæðisverð. Þétting byggðar á lóðum sem eru í höndum annarra aðila hefur ekki leyst húsnæðisvandann í Reykjavík. Lítið lóðaframboð borgarinnar og staðsetning húsnæðis á þéttingarreitum hefur leitt af sér hærra verð þar sem verið er að byggja á dýrustu stöðum bæjarins, allt á kostnað unga fólksins sem hefur ekki ráð á því húsnæði sem er í boði,“ segir Guðfinna.

Hún bendir á að frá því að núverandi meirihluti tók við vorið 2014 hafi lóð fyrir eitt fjöleignarhús með fleiri en fimm íbúðum verið úthlutað á kosningaárinu, einni lóð einnig árið 2015 og svo fjórum lóðum í fyrra. Í mars á þessu ári var svo tveimur lóðum úthlutað og í maí var fimm lóðum úthlutað.

Guðfinna segir að samkvæmt upplýsingum frá byggingarfulltrúa í Reykjavík er ekkert af húsunum á þeim lóðum sem hefur verið úthlutað á kjörtímabilinu, það er á síðastliðnum þremur árum, komið lengra en byggingarstig 4 sem er fokheldi.

Fundur borgarstjórnar hefst núna klukkan 14 og má fylgjast með útsendingu frá honum hér.