Honda og Sauber skilja að borði og sæng fyrir giftingu

Honda og Sauber höfðu fyrir skömmu tilkynnt að til stæði að setja Honda vél um borð í Sauber bílinn strax á næsta ári. Nú virðist sem upp úr hafi slitnað með brotthvarfi Monisha Kaltenborn liðsstjóra Sauber, sem yfirgaf liðið fyrir Bakú kappaksturinn.

Vélastjóri Honda, Yusuke Hasegawa var spurður um stöðu samningsins á blaðamannafundi fyrir austurríska kappaksturinn. Hann svaraði því til að samningurinn væri á milli Honda og Sauber og hann sæi ekki að breyting á forystu liðsins myndi breyta samningnum.

Undirtónn í slúðri helgarinnar á Spielbergbrautinni í Austurríki er sá að Honda eigi í stirðu sambandi við annað Formúlu 1 lið, nú Sauber en ekki McLaren. Samband McLaren og Honda hefur verið afar stirt og fjölmiðlar notað talsvert til að koma skotum á báða aðila. Mclaren liðar hafa þó verið duglegri að skjóta á Honda.

Hasegawa heyrði víst fyrst af brotthvarfi Kaltenborn frá Sauber á sama tíma og allir aðrir, í tilkynningu til fjölmiðla gefinni út um miðnætti daginn sem atburðirnir áttu sér stað sem leiddu til þess að Kaltenborn fór frá liðinu.

Heimildir þýska blaðsins Auto Bild, herma að upp úr samningum hafi slitnað á milli Honda og Sauber við brotthvarf Kaltenborn.

Nú er orðið ljóst að Fred Vasseur, fyrrum liðsstjóri Renault mun taka við keflinu hjá Sauber. Hann þarf nú að leita að nýrri vél fyrir næsta tímabil. Ætli hann snúi sér til Ferrari sem áður hefur skaffað Sauber vélar og gerir nú? Hann gæti einnig leitað til fyrrum vinnuveitanda síns, Renault.